Atyraý oblystyq tarıhı-ólketaný mýzeıinde ǵylymı qorǵa tarıhı qundylyqtardy qabyldaý saraptamalyq komısıasynyń kezekti otyrysy ótti. Tarıhı-mádenı máni bar jádigerlerdi oblystyq, aýdandyq mýzeıge qabyldap, qordy tolyqtyrý maqsatynda ótken jıynda «Men syıǵa tartqan jádiger» aksıasynda, «Otbasymen mýzeıge» festıvalinde turǵyndardyń syıǵa tartqan dúnıeleri sarapqa salyndy.

Nátıjesinde mýzeı sórelerinen Memleket jáne qoǵam qaıratkeri S.Muqashevtiń jeke qorynda jınaqtalǵan túrli taqyryptaǵy tósbelgiler jıyntyǵy, 1911 jyly Qazan baspasynan shyqqan arab jazýymen jazylǵan dinı kitapsha oryn aldy. Olardyń qatarynda 1980 jyldary qoldan toqylǵan túıe jún jempir jáne beldemshe, fonar, bilteli sham, «Sırıýs» radıollasy, 1957 jyly toqylǵan alasha men qur, shoıyn qazan, is mashınasy, kebeje de bar. Aýdandyq mýzeıler bólimshelerine Uly Otan soǵysynyń ardageri Tóleý Sabyrǵalıevtyń zattaı jáne qujattaı materıaldary, Isataı aýdandyq sport mektebiniń kýbok, medalóndary usynyldy.

«Budan basqa, Qazaq KSR-iniń Balyq ónerkásibi Halyq Komısary, Qazaq KSR Joǵarǵy keńesiniń depýtaty Ábishev Shaıhynyń 1958 jyldary paıdalanǵan telefon apparaty,  Qazaqstan Kompartıasy Gýrev oblystyq komıtetiniń eskertkish týy,  uly kúıshi Dına Nurpeıisovanyń beınesi beınelengen kilemshe, Qurmanǵazy aýdanynyń azamaty Muhtasıf Bektenovtiń qujattaı materıaldary qabyldandy. Endigi ýaqytta qor belgili qoǵam qaıratkeri Mellát Sabyrovanyń, QR Halyq ártisi Ázıdolla Esqalıevtiń, J.Nájimedenovtiń, A.Qaıýpovanyń, Q.Temirtashevtyń zattaı jáne qujattaı materıaldarymen tolyǵady. Jalpy, bıyl búginge deıin barlyǵy 436 dana jádiger qabyldandy» dedi mýzeı dırektory Rashıda Harıpova.