Taraz qalasyndaǵy Jeńis saıabaǵynda ornalasqan jıyrmaǵa jýyq atraksıonnyń tıisti ruqsat qujattarynsyz jumys istep jatqany anyqtaldy. Olardyń qatarynda quny 80 mıllıon teńgeni quraıtyn alyp sholý dóńgelegi de bar.

Atalǵan aýmaq 2019 jyly "Jasyl el Taraz" komýnaldyq qyzmeti arqyly jergilikti kásipkerge úsh jyl merzimge jalǵa berilgen. Alaıda keıinnen bul kelisimsharttyń zańsyz jasalǵany belgili bolyp, jer telimi memleket menshigine qaıtarylǵan. Soǵan qaramastan, kásipker atraksıondardy paıdalanýdy toqtatpaǵan.

Bıyl kóktemde kásipker sholý dóńgelegin óz betimen ornatyp, qurylys jumystaryn bastaǵan. Qala ákimdigi tarapynan birneshe ret aýyzsha jáne jazbasha eskertý jasalǵanymen, ol eskertýlerge mán bermeı, qyzmetin jalǵastyra bergen. Osyǵan baılanysty jergilikti bılik sotqa júginýge májbúr boldy.

— Osy jyldyń naýryz aıynda sholý dóńgeleginiń qurylysy bastaldy. Biz ákimdik jáne jergilikti polısıa tarapynan úsh márte eskertý jasadyq. Jer telimi memleket menshiginde ekenin jáne kez kelgen qurylysqa arnaıy ruqsat qajet ekenin túsindirdik. Bul talaptar sotqa joldanǵan talap-aryzda da naqty kórsetilgen, — dedi Taraz qalasy ákiminiń orynbasary Nursultan Isabekov.

Qazirgi tańda ákimdik zańsyz ornatylǵan atraksıondardy alyp tastap, aýmaqty bosatýǵa kúsh salyp jatyr. İs sot qaraýynda.