Sybaılas jemqorlyqqa qarsy qyzmet Májilis depýtaty Ádil Jubanovqa tıesili degen «BatysAlánsStroı» JSHS kompanıasyn tekserip jatyr. Bul týraly Telegram-daǵy «Za namı ýje vyehalı» arnasy habarlap, memlekettik satyp alýlar salasyndaǵy zańbuzýshylyqtarǵa qatysty jazbalarmen bólisken. Arnanyń dereginshe, materıaldar tirkelip, Atyraý oblysy boıynsha İshki memlekettik aýdıt departamentine joldanǵan.
Vedomstvonyń resmı málimdeýinshe:
«Qazirgi ýaqytta departament tarapynan laýazymdy tulǵalar men «BatysAlánsStroı» JSHS arasynda múddeler qaqtyǵysynyń bar-joǵy qarastyrylyp jatyr».
Atalǵan kompanıany buǵan deıin qazirgi Atyraý oblysy ákiminiń orynbasary Qaırat Nurtaev basqarǵan. Qazirgi zańdy dırektor — Janabaı Jubanov, ol depýtattyń týysy bolýy múmkin degen boljam bar.
Qazaqstan zańnamasyna sáıkes, depýtattardyń bızneske ıelik etýge quqyǵy bar, biraq ony basqarýǵa qatysýǵa tyıym salynǵan. Qazirgi tekseristiń negizgi baǵyty osy talaptyń oryndalýyn anyqtaýǵa baǵyttalyp otyr.
«BatysAlánsStroı» memlekettik tapsyrystar naryǵynda belsendi jumys isteıdi. 2016 jyldan beri kompanıa memlekettik mekemelermen jalpy somasy 15,2 mıllıard teńgeni quraıtyn 141 kelisimshart jasasqan. Bul kelisimderdiń basym bóligi Atyraý oblysyndaǵy qalalyq jáne aýyldyq ákimdiktermen baılanysty.
