2 jeltoqsan elimiz úshin aıtýly kúnderdiń biri. UFC-de Reseıdiń namysyn qorǵaǵan etnıkalyq qazaq Damır Ismaǵulov MMA boıynsha eń myqty qarsylastardyń biri Aleks Gordjesti jeńdi.
Jekpe-jek kezinde Reseıdiń týymen qatar Qazaqstannyń týyn alyp shyqqan Damır Ismaǵulov Sports.kz saıtyna suhbat berdi. Atalmysh suhbatty Qamshy.kz aqparat agenttigi qazaq tiline aýdyryp oqyrman nazaryna usynady.
— Damır, sizge jekpe-jek unady ma? Qalaı ótti?
— Barlyǵy jaqsy. Men kópten kútken kezdesýdi sátti aıaqtadym. Jeńis buıyrdy. Bul jeńiske jetý úshin talaı jyl ter tóktim. Qýanyshtymyn!
— Siz jekpe-jek aldynda oıǵa alǵan josparyńyzdy tolyq oryndaı aldyńyz ba?
— Jekpe-jektegi is-áreketimniń barlyǵy meniń josparymda boldy. Men azdaǵan soqqyny qabyldadym, biraq qarsylasyma qarymta soqqy qaıtara aldym.
— Bul UFC-degi alǵashqy jekpe-jegińiz ekeni belgili. Qobaljydyńyz ba?
— Men bir apta boıy qobaljyp, mazasyzdandym. Tipti uıyqtaı almadym. Birinshiden men jańa ortaǵa tez beıimdele almadym. Men úshin bul qıynǵa soqty. Ekinshiden, jankúıerlerdiń senimi maǵan qatty áser etti. Jan-jaqtan qysym boldy. Sebebi Qazaqstan men Reseıden basqa birneshe elderde meniń jankúıerlerim bar. Búkil álemniń nazary ózimde ekenin bilgende qatty qobaljydym. Maǵan álemdegi qazaqtar jyly lebizderin bildirip, qoldaý kórsetip jatyr. Osyndaı dúnıeler oıymdy bólip júrdi, jekpe-jekke bar nazarymdy aýdara almadym. Qıynǵa soqty. Alaıda komandammen birge oılastyrǵan josparymyz iske asty.
— Sizdiń jattyǵýlaryńyzdyń kóbisi Astana qalasynda ótipti?!
— Iá men Astanaǵa baryp jattyqtym. Alaıda bul negizgi jattyǵýlar emes edi. Men kóbinese Orynbor qalasyndaǵy «Boes» klýbynda jattyqqan bolatynmyn.
— Alǵashynda sizdiń qarsylasyńyz Konor MakGregordy jeńgen ırlandıalyq Djozef Daffı bolǵan edi. Alaıda bul jekpe-jek uıymdastyrylmady. Bul sizge keri áserin tıgizbedi me?
— Joq. Meniń úsh ret qarsylasym aýysty. Men árqaısysymen jekpe-jek ótkizýge daıyn edim. Alaıda olar bas tartty.
— Siz bir sózińizde qazaqtardyń qandaı ekenin álemge tanytqym keledi degensiz. Sizdiń jekpe-jekterińiz arqyly álem qazaqtar týraly ne bile alady?
— Negizi, búgingi jekpe-jekten keıin meniń qasyma kelip «bul qaı eldiń týy?», - dep suraǵandar kóp boldy. Búgin kóptegen sheteldik osy suraqtyń jaýabyn bildi.
— Siz úshin ýaıymdap, qoldaý bildirgen qazaqstandyqtarǵa aıtaryńyz bar ma?
— Men osyǵan deıin birneshe ret aıtqanmyn. Qazaqstandyqtarǵa qoldaý bildirgeni úshin alǵys aıtýdan jalyqpaımyn. Bul sońǵy jekpe-jek emes. Alda talaı sátti kezdesýler kútip turǵanyna senemin. Biz áli Amerıkamen qatar álemdi moıyndatamyz. Búgingi jekpe-jektiń tarıhta qalǵany úshin qýanyshtymyn.
Eske salsaq, Damır Ismaǵulov (16-2) jeńilip kórmegen aýstralıalyq Aleks Djordjespen (7-0) synǵa tústi. Jekpe-jek barlyǵy 3 raýndqa sozyldy. Tóreshilerdiń sheshimimen Damır jeńiske jetti.
