Ózbek tilindegi týyndyda aqynnyń balalyq shaǵy men ósken ortasy, shyǵarmashylyǵy men muraǵat qujattary keńinen kórsetilgen. Igi bastama Ózbekstan prezıdenti Shavkat Mırzıóevtiń qazaq aqyny Abaı Qunanbaıulynyń shyǵarmashylyq murasyn nasıhattaý týraly qaýlysy aıasynda júzege asyp otyr. Óıtkeni kórshi el basshysy «Abaı esimi men mol shyǵarmashylyq murasy qazaq halqynyń ǵana emes, barsha túrki halyqtarynyń, onyń ishinde ózbek halqynyń rýhanı damý tarıhynda óshpes iz qaldyrǵan» dep atap ótken bolatyn.

Qaýlynyń negizinde Tashkent qalasyndaǵy Derekti fılmder stýdıasynyń ujymy Abaıdýyń týyp-ósken jeri Semeıge arnaıy baryp, Jıdebaıdaǵy aqynnyń mýzeıinde bolǵan. Qazaqtyń keń dalasyn aralap, uly oıshyl aqynnyń ómirimen etene tanysqan.

Derekti fılmniń senarıin Rozıka Mergenbaeva jazypty.

«Qazaqstanǵa jasaǵan saparymyz fılmniń tolyqqandy jáne tushymdy dúnıe bolyp shyǵýyna múmkindik berdi», – deıdi rejıser Shýhrat Mahmýdov.

«Shyn máninde ózge halyqty qalaı qurmetteýge bolady? Buǵan jaýap bar, ol elde qandaı adamdar ómir súrgen, qandaı ǵalymdar men aqyndar, jazýshylar bolǵanyna qarap ta baǵalaýǵa bolady. Sol halyqtyń mádenıetin, jetken jetistikterin saralaý arqyly da kórshi eldi qurmetteýimiz kerek. Sondyqtan biz bul shyǵarmany búgingi jastarymyz Ortalyq Azıa aýmaǵynda, jalpyǵa ortaq keń baıtaq dalamyzda qandaı ǵulamalar men uly oıshyldar ómir súrgenin bilsin degen úmitpen jasady. Óıtkeni biz baǵzy zamannan týys bolyp óstik. Bóle jaratyn eshteme joq. Biz ótkenimizden medet alyp, sonymen maqtanýymyz kerek. Sonyń biri – Abaı. Biz sondyqtan bul týyndyǵa bar kúshimizdi jumsadyq», – deıdi derekti fılm rejıseri Shýhrat Mahmýdov.