QR Parlament Senatynyń depýtaty Darıǵa Nazarbaeva mektepterdi tikeleı qarjylandyrýdy usynyp otyr, dep xabarlaıdy Qamshy.kz aqparat agenttigi QazAqparatqa silteme jasaı otyryp.  

«Qazir mektepterdi jan basyna qaraı qarjylandyrý júıesi engizilip jatyr. Menińshe, ol aqsha tikeleı Astanadan bólinetin bolsa, oblystyq, qalalyq jáne aýdandyq bilim basqarmalary múldem qajetsiz bolyp qalady. Bul - óte mańyzdy másele. Sebebi mektepke búdjet qarjysy bólingende, ol aqsha biraz ýaqyt jańaǵy basqarmalarda jatyp qalady. Olar ony búgin bere me? Erteń bere me? Ashyǵyn aıtý kerek, búdjet qarjysyn únemdeımiz dep, tolyǵymen bermeýi de múmkin. Artynan kitaptarǵa, ıa bolmasa, kúrdeli jóndeýge ata-analardan jınaı salasyńdar dep, jyly jaba salady. Ol jerde zańbuzýshylyqtar kóp. Menińshe, ondaı basqarmalardyń bárin jaýyp tastaý qajet», - dedi D.Nazarbaeva jýrnalıserge bergen suxbatynda. 

Onyń aıtýynsha, búginde osy salada oń tájirıbe de bar. Shetelde mektepterdi tikeleı qarjylandyrady. Ondaıda QR Bilim jáne ǵylym mınıstrligi aqparattyq texnologıalar arqyly tikeleı baqylaý sharalaryn da júrgize alady. «Mysaly, qazir «Kúndelik» degen tamasha baǵdarlama bar. Búdjetten kóp shyǵyn shyqqan joq. Biraq ishinde mektepter, oqýshylar, muǵalimder men ata-analar týraly kóp aqparat bar», - dep atap kórsetti D.Nazarbaeva.