1 naýryz kúni  ulttyq  naqyshtaǵy  kádesyılar men  zergerlik  buıymdar  óndiretin «Ádemi-aı»  kompanıasy jáne «Ádemi-Aı» óner murajaıy birlesip «Ult jaýharlary»  atty kórme ótkizdi.  Kórme 8 naýryz halyqaralyq áıelder merekesiniń  qurmetine oraı uıymdastyrylyp, onda kóne jádigerler men jańa kádesyılar usynyldy. 

Kórmege Almaty qalasynyń ákiminiń orynbasary Záýresh Amanjolova, Almaty qalasy ákimshiligi janyndaǵy «Áıelder isi jáne otbasy-demografıalyq saıasat jónindegi genderlik komısıa» músheleri, BAQ ókilderi jáne  qala turǵyndary qatysty. Kórmede sóz alǵan Záýresh Amanjolova búgingi  «Ádemi-Aıdyń»  osy  ıgi  sharasyn  óte joǵary baǵalap, jańa kádesyılarǵa degen tańdanysyn jasyrmady. Ult muralaryn ulyqtap júrgen Bahargúl Tólegenqyzyna ıgi tilekterin  aıtty. Kórme sońynda sóz alǵan kompanıa dırektory Bahargúl Tólegenqyzy jınalǵan  kórermendi   kele jatqan 8 naýryz halqaralyq áıelder merekesimen quttyqtaı otyryp,  kompanıanyń   búgingi maqsaty týraly bylaı dedi: - Bizdiń bastapqy maqsatymyz ózimizdiń ulttyq qundylyqtarymyzdy ulyqtap, salt-dástúrimizge saı kádesyılar shyǵarý bolatyn, soǵan saı osy kúnde jumys jasap kelemiz. Jalpy búgingi sizderge kórsetip otyrǵan kádesyılarymyz-  bizdiń dızaınerler tobynyń sońǵy 6 aı kólemide jasaǵan eńbeginiń jemisi. Biz qazir murajaıda turǵan  baıyrǵy  buıymdarymyzdy jańǵyrtyp, negizgi erekshelikterin saqtaı otyryp, búgingi kúnge saı nusqasyn jasaýdy qolǵa aldyq. Máselen, aldaryńyzda turǵan óńirjıek, qudaǵı júzik, shashbaý, bilezik sıaqty áshekeı zattyrda osydan 2 ǵasyr burynǵy belgiler qaz qalpynda saqtaldy. Qurmetti BAQ ókilderi, bizdiń osyndaı atqaryp jatqan jumysymyzdy el-jurt bilip, artyq-kemimizdi aıtýy tıis dep oılaımyz, ol úshin sizderdiń kómekterińiz, qoldaýlaryńyz aýadaı qajet. Sol úshinde osy kórmeni uıymdastyryp otyrmyz. «Ádemi-aı» kompanıasy usynǵan jańa kádesyılardyń qatarynda, qazaq eliniń tarıhynan syr shertip, búgingi kelbetin beıneleıtin «Qazaqstan tarıhy» tabaqshasy, «Naýryz», «Jeti qazyna», «Ertoqym» kartınalary, zergerlik áshekeıler,  jibekten jasalǵan toqyma buıymdar, óńirlerge arnalǵan tabaqshalar toptamasy, qazaq halqynyń soǵys qarýlary men saz aspaptary úlgisinde jasalǵan flesh-kartalar boldy. Osyndaı kórme jýyrda Astana qalasynda ótedi dep josparlanýda.