Búginnen bastap Qazaqstanda keıbir sheteldik telearnalardyń translásıasy toqtatylady dep habarlady Tengrinews saıty. Osydan týra bir jyl buryn qabyldanǵan «Teleradıohabarlar taratý týraly» zańǵa sáıkes, 2013 jyly naýryzdyń 1-ine deıin Qazaqstannyń mádenıet jáne aqparat mınıstrliginde qaıta tirkeýden ótpegen sheteldik teleradıoarnalardyń habarlaryn Qazaqstanda taratýǵa tyıym salynady. Mınıstrliktiń aqparat jáne muraǵattar komıtetiniń málimeti boıynsha, 2013 jyldyń 1 naýryzynda esepke qoıylǵan sheteldik telearnalardyń sany 159 dep kórsetilgen. Qazaqstanda kabeldik telehabar taratýshy operator qyzmetin kórsetetin «Digital TV» kompanıasynyń basshysy Qýat Bahrıdınov kóptegen sheteldik telearnalar Qazaqstandaǵy kórermen aýdıtorıasyn azsynatyndyqtan tıisti esepke turýǵa qushtarlyq tanytyp otyrǵan joq deıdi. Onyń aıtýynsha, búginnen bastap Russia Today, Bloomberg, World Fashion Channel, Soıýz jáne basqa telearnalardyń habarlaryn taratý doǵarylady. Buǵan deıin Qazaqstandaǵy operator kompanıalardyń basshylary mádenıet jáne aqparat mınıstrliginen sheteldik teleradıokompanıalardy esepke alý merzimin 2013 jyldyń qyrkúıek aıyna deıin uzartýdy suraǵan edi. Sheteldik buqaralyq aqparat quraldaryn esepke qoıýdyń memlekettik qyzmet standarty 2013 jyly qyrkúıektiń 12-inde qabyldanǵan.
http://www.azattyq.org
Pikir qaldyrý