Bıyl Elbasy N.Nazarbaev shilde aıynyń alǵashqy jeksenbisin ulttyq dombyra kúni etip bekitý týraly jarlyqqa qol qoıǵan edi. Osy maqsatta «Adyrna» ulttyq-etnografıalyq birlestigi Almaty qalasy Din isteri jónindegi basqarmasynyń tapsyrysymen shahardaǵy birqatar saýda ortalyqtarynda kezdesýler ótkizdi. «Din men dástúr» taqyrybynda ótken kezdesýlerdi dintanýshy-ǵalym, Qazaq-Egıpet ıslam ýnıversıtetiniń doktoranty Asyltaı Tasbolat júrgizip, ol bazar jamaǵatyna qazaqtyń ulttyq dombyra kúni týraly áńgimeledi.

Qazaqtyń bas mýzykalyq aspabyna kúmánmen qarap, ony «shırk» dep sanaıtyn dinı fanatıkterdiń elimizde paıda bolǵanyna biraz jyldardyń júzi bolǵan. Ol azdaı dombyrany «shaıtannyń dańǵyrlaǵy», «shaıtannyń taıaǵy» deıtin toptar tóbe kórsetip, myńdaǵan jyldar boıy babalarymyzdan mura bolyp kele jatqan ulttyq jádigerimizdi tabandylyqpen qorǵaýǵa týra keldi. Almaty qalasyndaǵy kúdikti dinı jamaǵat ókilderiniń kóbi saýda ortalyqtarynda toptasqandyqtan, olarǵa baryp dombyranyń qasıeti týraly áńgime qozǵaý búgingi zamanda oryndalýǵa tıis mańyzdy jumystardyń biri edi. «Qolymdaǵy qý aǵash, Saırap otyr bul aǵash. Qolymdaǵy aǵashym – Alyp júrgen dombyra... Dombyra kúná degen sóz Tek bir aıtqan dabyra», dep Qashaǵan Kúrjimanuly jyrlamaqshy, dombyrany kúná dep dabyrlaıtyndardyń sany kóbeıse, halyq úshin naǵyz tragedıa sol bolady.

Asyltaı Tasbolattyń aıtýynsha dombyra úzdiksiz barlyq jerde  nasıhattala berý kerek. Óıtkeni kúmándi dinı toptardyń aram pıǵylyna aldanyp, ulttyq mýzyka aspabyna teris kózqaraspen qaraıtyn adamdar áli dep kóp eken. «Qazaq halqy san ǵasyr boıy talaı qyrǵyn men alapatty bastan keshirsede, qolynan dombyrasyn tastamaı keldi. Biraq elimiz táýelsizdik alyp, eńseli el boldyq-aý degen kezde, talaı zamannyń synaǵynan synbaǵan dombyramyzǵa basqa jaqtan qaýip tóndi. Mysaly Almaty qalasyndaǵy «Barys-4» bazarynda bir dindar maǵan «Gıtara men dombyranyń túbi bir ǵoı, dombyra qalaı halal bolady?» dep suraq qoıdy. Men oǵan qazaq tarıhynda qanshama ǵulama dinı nasıhatty dombyramen jetkizgenin, beıbit zamanda da, jaýgershilik zamanda da dombyra dala balasynyń jan serigi bolǵanyn mysaldarmen túsindirdim» deıdi ol.

Aıta keteıik, nasıhat jumystary qaladaǵy «Juldyz», «Tastaq», «Qazyna», «Arlan», «Kenjehan» saýda ortalyqtarynda júrgizildi.    

O.Temirbek