Búgingi tańda Memlekettik qyzmet isteri jáne sybaılas jemqorlyqqa qarsy is-qımyl agenttiginiń negizgi basymdyqtarynyń biri bıznesti qorǵaý bolyp tabylady.

Bıylǵy jyly elimiz boıynsha Agenttiktiń bastamasymen ınvestorlar men kásipkerlerdiń quqyqtaryn qorǵaý baǵytynda «Protecting Business and Investments» jobalyq ofısi jumys isteı bastady.

Atalmysh jobany iske asyrý sheńberinde Agenttik kásipkerlerdiń aldynda turǵan barlyq prosesterge belsendi qoldaý kórsetedi. Sybaılas jemqorlyq sqemalarynan úzildi kesildi bas tartýǵa daıyn kásipkerler óz bıznesin kez-kelgen qysymnan qorǵaý múmkindigine ıe bolmaq.

Qazirdiń ózinde otandyq jáne sheteldik ınvestorlardyń jalpy somasy 6,7 trln teńgeden asatyn 249 jobasy boıynsha sybaılas jemqorlyqqa qarsy is-qımyl júrgizilgen. Sondaı-aq, memlekettik qyzmet salasyndaǵy máselelerdi jedel sheshý maqsatynda "Sıfrly agent" mobıldi qosymshasy iske qosyldy. Qoldanba onlaın-sıgnal negizinde qyzmet kórsetýshige máselelerdi der kezinde sheshýge múmkindik beredi.

Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵa orynbasary Aıgúl Shaımovanyń bıznes sýbektilermen kezdesýi barysynda Tarazdaǵy kásipkerlerdiń negizgi máseleleri keńinen talqylandy.

Jıyn barysynda agenttik tóraǵasynyń orynbasary Aıgúl Shaımova kásipkerlik sýbektileri elimizdiń qaryshtap damýy úshin ózara jaýapkershilikti túpkilikti moıyndaý kerek ekenin atap ótti.
- Memleket sizder úshin qolaıly jaǵdaı jasaýǵa mindetti. Bul baǵytta úlken sharýalar atqaryldy. Sizder óz kezekterińizde adal bıznes júrgizý úshin jaýapty bolýlaryńyz tıis. Bul saýalǵa kelgende memleket pen bıznes senimdi serikteske aınalýy qajet. Osy sebepti barshańyzdy atalǵan jobaǵa atsalysýǵa shaqyramyz,- dedi Aıgúl Shaımova.
Agenttik ókili atqarýshy bılik organdarymen birlesip jumys isteý barysynda saýaldar týyndasa, árbir kásipker ózine tikeleı ótinish bere alatynyn atap ótti. Sondaı-aq, kez kelgen ótinish jiti baqylaýǵa alynatynyn, al qosymsha tekserýdi talap etpeıtin máseleler der kezinde sheshimin tabatynyn aıtty .