Almatyda qalalyq Memlekettik kirister departamenti «Mobıldi keńse» jobasyn iske qosty. Onda kásipkerler salyqshylardan tegin keńes alyp, kásibin zańdastyryp, onlaın kasalyq apparatyn tirkeýge múmkindik bar. Aıta keteıik, qazirgi tańda qaladaǵy 58 bazarda 15 myńnan astam azamat kásip jasap otyr. Olardyń 10 myńyna jýyǵy kasalyq apparat qoımaǵan. 

Bul qaladaǵy eń iri bazarlardyń biri. Munda myńdaǵan kásipker kásibin dóńgeletip otyr. Olardyń yńǵaılylyǵy úshin búginnen bastap mynadaı jyljymaly mobıldi keńseler iske qosyldy. Bul jerde olar úshin túrli memlekettik qyzmetter kórsetiledi.

Mametjan Itakov osydan eki apta buryn onlaın kasalyq apparat satyp alǵan. Alaıda, salyq organyna baryp tirkep úlgermepti. Kásipker qalada jumysyn bastaǵan arnaıy keńsede ony zańdastyrýǵa múmkindik aldy.

«Jeke kásipkerlerge jeńildik boldy. Salyq organyna barmaı-aq, osy jumysqa jyljymaly «Mobıldi keńse» kelip, túgel kasalyq apparattardy, qujattardy ákelip, tirkep, sodan keıin bárin túsindirip berdi», – dedi kásipker Mametjan Itakov.

Alyp shahardaǵy bazarlarda 15 myńnan astam kásipker qyzmet etip jatyr. Sonyń 10 myńǵa jýyǵy onlaın kasalyq apparatyn paıdalanbaıdy. Sebebi, 4 myńnan astamy patent boıynsha jumys isteıdi. Kelesi jyldyń 1 qańtaryna deıin ony ornatpaǵan jaǵdaıda 15 aılyq eseptik kórsetkish kóleminde, ıaǵnı 36 myń teńge aıyppul salynady.

«Almaty qalasy ákimdigimen birlesken is-qımyl jospary bekitildi. Sonyń ishinde, jergilikti búdjetten qarajattar bólindi. 3 avtokóligi shaǵyn avtobýsy berilip jatyr. Olar birinshi kezekte Alataý men Jetisý aýdandarynda ornalasady», – dedi Almaty qalasy Memlekettik kirister departamenti túsindirý jumysy basqarmasy bóliminiń basshysy Aıjan Bekeeva.

Onlaın kasalyq apparattary chektegi barlyq aqparattardy avtomatty túrde salyq organynyń derekter qoryna jiberip turady. Nátıjesinde, kásipkerdiń tóleıtin mindetti salyq mólsheri esepteledi.

«Buryn esepti salyq organyna ótkizetin edik. Endi qazir barlyǵy onlaın rejımde júredi. Qaǵaz qujattardy toltyrýdyń qajeti joq. Osy ońaı boldy», – deıdi kásipker Mametjan Itakov.

«Baqylaý kasalyq apparatynda fıskaldy jady bolatyn. Mashına isten shyqqan jaǵdaıda, urlanyp nemese joǵalyp ketse, saqtalǵan derekter qalpyna keltirilmeıtin. Al onlaın kasalyq apparatynyń artyqshylyǵy, onyń fıskaldy jadymen qosa, «Qazaqtelekom» kompanıasy júıesinde jeke kabıneti bolady. Sol arqyly barlyǵyn qalpyna keltire alasyz. Oǵan qosa, kásipkerdi tirkeýden shyǵaryp, salyq esebin tapsyrýǵa múmkindik bar», – dedi kasalyq apparattar boıynsha qyzmet kórsetetin kompanıa basshysy Madına Kýbaldıeva.

Qazir qalada 58 bazar jumys isteıdi. Onyń basym bóligi Alataý jáne Jetisý aýdanynda shoǵyrlanǵan. Mundaı «Mobıldi keńse» qajettilik boıynsha qalǵan saýda oryndaryna da shyǵatyn bolady.