Almaty qalasynyń ákimdigi qoǵamdyq kólikpen júrý aqysyn kóbeıtý týraly tasymaldaýshylardyń usynysyna jaýap berdi.
«Almaty qalasynyń Jolaýshylar kóligi jáne avtomobıl joldary basqarmasy ýaqytyly bólinip jatqan sýbsıdıalar kólemi kóliktik qyzmetterdi sapaly kórsetý úshin jetkilikti dep sanaıdy. Sondyqtan keıbir tasymaldaýshylardyń tarıfti kóterý qajettigi týraly ótinishteri negizsiz. Adamdar shaǵym keltirmeıtindeı áýeli tártip ornatyp, sapasyn kótersin, sosyn surasyn. Biz úshin basty kórsetkish - qala turǵyndarynyń qanaǵattaný deńgeıi. Biraq onymen áli de jumys isteý kerek», - dedi basqarma basshysynyń orynbasary Erlan Ádilov.
Bul rette, qoǵamdyq tasymaldaýlardyń áleýmettik mańyzy eskerile otyryp, ákimdik saıasaty kólik qyzmetteriniń halyqqa qoljetimdi bolýyn qamtamasyz etýge baǵyttalǵany atap ótildi. Sondyqtan tasymaldaýshylarǵa qoǵamdyq kólikti jańartý jáne damytý úshin qomaqty qarajat bólinýde. Budan basqa, qoǵamdyq kólikterdi qarajattandyrý jol júrý aqysyn turǵyndar úshin qoljetimdi deńgeıde ustap, halyqtyń áleýmettik turǵydan osal toptaryna jeńildik tarıfterin usynýǵa múmkindik berip otyr.
«Qazaqstandaǵy «Ońaı» elektrondyq bıletteýdiń birinshi júıesi mol tabysty «kóleńkeden» shyǵaryp, ony qala ekonomıkasyna tartýǵa múmkindik berdi. Mysaly, qazan aıynda tranzaksıalardyń rekordtyq sany jasalyp, 2,9 mlrd teńge jınaldy. Al 2016 jyldyń qyrkúıeginde naryq aınalymy nebári 700 mln teńgeni quraǵan bolatyn. Osy aqshanyń barlyǵy qaıda ketti? Uzaq ýaqyt boıy 80 teńgelik tarıf elde eń joǵary bolyp, kóp bóligi qolma-qol aqshamen tólengen. Almatydaǵy jolaýshylar leginiń basqa qalalarǵa qaraǵanda birneshe ese kóp bolýyn da esepke alýymyz kerek. Búginde aqshasyz tólem jasaýdyń úlesi 98 paıyzdan asyp otyr. Iaǵnı jańa sıfrlyq sheshimder salany «kóleńkeden» shyǵaryp, avtobýs parkiniń jańartylýyn jyldamdatty. Búginde 1098 avtobýs satyp alynǵan. Jyl sońyna deıin jańa qoǵamdyq kólik úlesin 87 paıyzǵa deıin jetkizý josparlanyp otyr. Tasymaldaýshylar tarıftiń ashyqtyǵy arqyly bankten nesıe alyp, ózderiniń kólik parkterin damytýǵa qarajat alatyn edi», - dep túsindirdi ákimdiktiń resmı ókili Tımýr Bazarbaev.
