Kásipodaqtardyń qyzmeti túbegeıli ózgeredi. 2018-2019 jyldarǵa arnalǵan «Almaty qalasy kásipodaqtaryn modernızasıalaýdyń jol kartasy» osy maqsatta ázirlendi.

Qujat adamı kapıtaldy damytý, eńbek qatynastaryn jaqsartý, kásipodaqtardy nyǵaıtý sekildi máselelerdi qamtıdy. Almatyda 173 myńnan astam adam 50 myń teńgeden tómen jalaqy alady eken. «Jol kartasy» baǵdarlamasyn iske asyrýdyń nátıjesinde, birqatar kásiporyndardyń basshylary men qyzmetkerleriniń jalaqysy 10-15 paıyzǵa kóterilgen.  

«Áleýmettik seriktesterimizben atqarǵan jańa formattaǵy jumysymyzdyń nátıjesinde, tómen jalaqy alatyn 173 myń almatylyqtyń aılyqtary kóbeıetin boldy. Qazirdiń ózinde eki júzge jýyq mekemeniń basshylary qyzmetkerleriniń aılyǵyn 15 paıyzǵa deıin arttyrdy. Sonymen qatar, qaladaǵy kásiporyndarda ujymdyq shart jasasý týraly júıeli jumystar atqarylýda. Sońǵy 2 aıdyń ózinde 2 myńnan astam áriptestik shart jasaldy», – dedi «Almaty qalasy Kásipodaqtar ortalyǵy» aýmaqtyq kásipodaqtar birlestiginiń tóraıymy Záýresh Ómirbaeva.