2018 jyldyń 7-8 jeltoqsanynda Qaraǵandy qalasyndaǵy E.A. Bóketov atyndaǵy Qaraǵandy memlekettik ýnıversıtetinde «Rýhanı jańǵyrý» baǵdarlamasy aıasynda Qazaqstan tarıhy jáne QHA kafedrasy bazasynda «Qazaqstan - meniń Otanym» atty IV Respýblıkalyq stýdenttik konferensıa ótti.
Atalmysh konferensıaǵa E.A. Bóketov atyndaǵy QarMÝ, L.N. Gýmılev atyndaǵy EUÝ, Ybyraı Altynsarın atyndaǵy ArMPI, Pavlodar memlekettik pedagogıkalyq ınstıtýtynyń, M.Ótemisov atyndaǵy Batys Qazaqstan memlekettik ýnıversıtetiniń, Q.A. Iassaýı atyndaǵy Halyqaralyq qazaq-túrik ýnıversıtetiniń jáne Ómirzaq Sultanǵazın atyndaǵy Qostanaı memlekettik pedagogıkalyq ýnıversıtetiniń stýdentteri qatysty.
Ómirzaq Sultanǵazın atyndaǵy Qostanaı memlekettik pedagogıkalyq ýnıversıtetiniń áleýmettik- gýmanıtarlyq fakúltetiniń «Tarıh» mamandyǵy boıynsha on stýdent, «Quqyq jáne ekonomıka negizderi» mamandyǵy boıynsha úsh stýdent ózderiniń zerttep júrgen ǵylymı jumystary boıynsha baıandama jasady.
«Tarıh» jáne «Quqyq jáne ekonomıka negizderi» mamandyǵynyń stýdentteri ekinshi, úshinshi dárejeli dıplomdarmen jáne alǵys hattarmen marapattaldy. Maqalalary jaryq kórgen jınaq ár stýdentke tabystaldy.
Konferensıany uıymdastyrý tıisti deńgeıde boldy. Bizdiń stýdentterdi qarsy alyp, QarMÝ jataqhanasyna tegin jaıǵastyrdy.
Ýnıversıtetimizdiń stýdentteri respýblıkamyzdyń basqa túkpirlerinen kelgen ǵalymdarmen jáne zertteýshi stýdenttermen tanysyp ǵylymı zertteý taqyryptaryna qatysty máselelerdi kópshiliktiń talqysyna salýǵa múmkindik aldy. Árıne, mundaı jetistik stýdentterdiń izdenýlerimen olardyń ǵylymı jetekshileriniń eńbekteriniń nátıjesi. Stýdentterdiń ǵylymı jetekshileri - t.ǵ.d., profesor Amanjol Kúzembaıuly, t.ǵ.k., qaýymdastyrylǵan profesor Isenov Ótegen, t.ǵ.k., dosent Maısara Bekmaǵambetova, t.ǵ.k., dosent Naýryzbaeva Elmıra, PhD doktory Raýan Baıdallardyń shákirtterdi ǵylymǵa baýlýdaǵy jetistikterimen quttyqtaımyz.
Konferensıadan soń «Tarıh» mamandyǵynyń stýdentteri álemge áıgili «Karlag» murajaıyna (Dolınka kentiniń saıası qýǵyn-súrgin qurbandaryn este saqtaý mýzeıi) ekskýrsıa jasady. Mýzeıde bolǵan stýdentterdiń aıtýynsha, áli kúnge deıin zertteýdi qajet etetin Karlagtyń ashylmaǵan qupıalary jetkilikti.
Abır Symbat, Altynbek Gúlsaıa
«Tarıh» mamandyǵynyń 4 kýrs stýdentteri
Qostanaı-Qaraǵandy
