Keler jyly Almatyda 8 mekteptiń qurylysy bastalady. Bul týraly Almaty qalasynyń ákimi Baýyrjan Baıbek málimdedi.

«Intensıvti mıgrasıaǵa jáne qalaǵa qosylǵan eldi mekenderge baılanysty bala sany kún sanap arta túsýde. Sońǵy úsh jyl ishinde oqýshylardyń sany 40 myńǵa ósti. Bul árıne, oryn sanynyń jetispeýine ákeledi. Tek bıyldyń ózinde bizde 15 myń oqýshy orny jetispeıdi. Búdjettik qarjy esebinen sońǵy jyldary qalada 7 myń oryndy mektep salyndy. Jyl aıaǵyna deıin Alataý aýdanynda 600 oryndy mektep qurylysy bitedi. Jeke ınvestorlar esebinen mektepter salynýda, olardyń qatarynda «Sábı» Qory, Geteýeı kompanıasy, Roıal Konstrakt BV bar», - dedi qala ákimi.

Qazirgi ýaqytta 3 myń oryndy halyqaralyq «SABIS» mektebininiń jobalyq-smetalyq qujattary jasalýda.

Sonymen qatar, Almatyda bos jer telimderiniń bolmaýy jańa mektepter salýǵa keri áser etetindigin de atap ótti.

«3 jastan 6 jasqa deıingi 20 myńnan astam baldyrǵandar balabaqshaǵa kezekte tur. Bul máseleni sheshý úshin sońǵy tórt jylda 3 myń oryndy 23 memlekettik, 17 myń oryndy kotejderde ornalasqan 500 jeke bala baqshalar ashyldy. Jeke bala baqshalardy yntalandyrý barysynda memleket 26 mıllıard teńge búdjettik qarjyny únemdedi. Osynaý aýqymdy únemdeý bizdiń durys jolda ekenimizdi kórsetedi. Sonymen qatar, jaqyn arada taǵy da 3 myń oryndy 13 memlekettik bala baqsha iske qosylatyn bolady»,- dep balabaqsha tapshylyǵy máselesine de toqtalyp ótti.

Memlekettik-jeke áriptestik mehanızmin tıimdi paıdalana otyryp, bul iske bıznesti de keńinen tartýda. Sońǵy úsh jyl ishinde qala qurylysy keńesinde ınvestorlar esebinen 9 myń oryndy 70-ten astam bala baqsha salý jóninde sheshim qabyldanǵan. Sondaı-aq, «Bazıs-A» kompanıasy jeke qarjysy esebinen balalar tyǵyz ornalasqan úsh mektepke qosymsha oqý korpýstaryn salyp bermek.