Oljas Súleımenov jıen nemeresiniń ólimine qatysty taǵy da hat jazdy, dep jazady Qamshy.kz aqparat agenttigi zakon.kz saıtynyń deregin negizge alyp.
Sot otyrysy kezinde Oljas Súleımenovtyń jańa haty oqyldy. Ol Malıka Muhıtovanyń jazasyn jeńildetip, bas bostandyǵynan aıyrmaýyn surady. Sondaı-aq ol hatty jazǵan kezde Eskendirdiń ata-anasymen aqyldaspaǵanyn aıtqan.
♦Malıkanyń sottaǵy sońǵy sózi: Eskendirdi túsimde kórdim
«26 jeltoqsanda meniń jıen nemerem Eskendir Súleımenovtyń ólimine qatysty apelásıalyq sot otyrysy ótedi. Meniń qyzym, Eskendirdiń anasy Leılá Súleımenova men Sergeı Hanǵa bul jaıttyń uzaqqa sozylýy fızıkalyq jáne psıhologıalyq turǵydan áser etip jatyr. Ásirese qyzyma. Osy ýaqytqa deıin menen Muhıtovanyń týystary keshirim berýimdi ótinip júrdi. Men jol apatynyń qasaqana jasalmaǵanyn bilemin. Onyń týystary otbasynyń úlkeni men bolǵandyqtan menimen kezdesýdi qalady. Olarmen kezdeskennen keıin birneshe aı boıy men jıen nemeremniń ólimine sebepker bolǵan qyzdyń taǵdyry týraly oılana bastadym. Osyndaı sezimmen meniń jazǵan hatym, Muhıtovanyń jazasyn jeńildetý týraly ótinishim 20 jeltoqsanda ótken sot otyrysyna jóneltilgen bolatyn. Alaıda bul hat Astana qalasyna jetpeı turyp-aq áleýmettik jelige taralyp ketti. Sondaı-aq jazǵan hatym meniń týǵan týystarymnyń arasynda úlken rezonans týdyrdy. Árıne, hatty jazbas buryn qyzym men Sergeımen aqyldasýym kerek edi. Meniń tarapymnan qatelik ketti. Alaıda sot meniń jazany jeńildetýge qatysty aıtqan ótinishimdi jeke adamnyń kózqarasy retinde qabyldaıdy dep senemin. Sondaı-aq meniń jasaǵan málimdemem Eskendirdiń ata-anasynyń kózqarasymen sáıkes kelmeıdi. Bul meniń jeke pikirim. Qurmetpen Oljas Súleımenov», — dep jazylǵan hatta. Bul hatty sot otyrysy kezinde advokat Almıra Shaıhın oqyp berdi.
♦Oljas Súleımenov Malıka Muhıtovany keshirdi
Eske sala ketsek, belgili aqyn, jazýshy Oljas Súleımenovtiń nemeresi 27 jastaǵy Eskendir Súleımenov Astanada jol apatynan kóz jumǵan edi. Jol apaty Máńgilik el – Kereı Jánibek handar kósheleriniń qıylysynda bolǵan. Jas jigit motosıkl júrgizip kele jatqan. Eskendir Súleımenovti Qyzylorda oblysy ishki ister departamentiniń bastyǵy, polısıa polkovnıgi Qaırat Muhıtovtiń qyzy Malıka Muhıtova qaǵyp ketken. 29 jastaǵy Malıka Muhıtova sot otyrysynda marqumnyń ata-anasynan jylap keshirim surady. Óziniń kinásin tolyǵymen moıyndap, zardap shekken tarapqa materıaldyq shyǵyndy tóleýge daıyn ekenin málimdedi.
♦Eskendir Súleımenovtiń qalyńdyǵy: Hatym sol kúıi oqylmaı qaldy
24 qazanda ótken sot otyrysynda zardap shekken tarap sottalýshydan 14 mıllıon teńge mólsherinde materıaldyq shyǵyn óndirýdi talap etken edi. Alaıda keıin marqumnyń otbasy ol talap-aryzdy qaıtaryp aldy.
9 qarashada ótken jaryssóz barysynda memlekettik aıyptaýshy Álisher Baraev aıyptalýshy Malıka Muhıtovany eki jylǵa bas bostandyǵynan aıyrýdy jáne úsh jyl kólik júrgizýge tyıym salýdy suraǵan edi.
Marqumnyń ata-anasy qazaqstandyqtarǵa úndeý jasap, sottalýshynyń shyn ókingenine senbeıtinin aıtty. Alaıda 20 jeltoqsanda Oljas Súleımenov Malıka Muhıtovanyń jazasyn jeńildetýdi surap hat jazǵan bolatyn.
