Almatynyń qylmystyq ister jónindegi mamandandyrylǵan aýdanaralyq sotynda Shyǵys aınalma avtomobıl jolynda óz balasyn taspen urǵan er adamǵa qatysty sot otyrysy bastaldy dep jazady Qamshy.kz aqparat agenttigi Tengrinews.kz saıtynyń deregin negizge alyp.
Sot aldyna Murat Asqaroǵly keldi. Er adam QR Qylmystyq kodeksiniń 99-babynyń 2-bóligi 3-tarmaǵy jáne 24-baptyń 3-bóligi boıynsha («Kináli adamǵa dármensiz kúıde ekeni kórineý belgili adamdy, sol sıaqty adamdy urlaýmen ne kepilge alýmen ushtasqan») aıyptalyp jatyr.
Asqaroǵly sot barysynda balasyn taspen urmaǵanyn málimdedi.
«Ulymdy urǵanym joq. Qandaı áke óz balasyna qol kótere alady? Ulym jol-kólik oqıǵasy boldy dep aıtty. Balam meni saǵynyp jatyr. Ákem bolsa, bes mınýtqa kelip ketedi, anam da kelip turady. Ulymdy áli kórmedim. Balalarym meni surap jatyr. Qaǵazdarǵa qol qoıdyrý úshin kinámdi moıyndaýyn surady. Biraq men ulymdy urǵan joqpyn. Ol kezde jumysta boldym, muny adamdar rastap bere alady. Mas bolǵan joqpyn», - dedi Murat Asqaroǵly.
Eske salaıyq, 2018 jyldyń shildesinde Almatydaǵy Shyǵys aınalma avtojolynda essiz kúıde tabylǵan 4 jasar Muhamad Asqaroǵlyny óz ákesi taspen urǵany anyqtalǵan edi.
Balanyń ákesi Murat Asqaroǵly bul qylmysty ózi jasaǵanyn moıyndap, mas kúıde bolǵanyn aıtqan bolatyn. Keıinirek ol sotta qamaýǵa alý týraly sanksıa jaıly aıtylǵanda ol jylap jibergen edi. 1985 jylǵy er adamnyń beton zaýytynda jumys isteıtini belgili. Úılengen, eki uly bar.
