Opozısıa degenniń ózi bytyrap ketti ǵoı. Buryn osyndaı saılaýlardan keıin bárimiz jınalyp, baǵa berip jatatynbyz. Búginde o da joq.
Sondyqtan saılanǵan prezıdentke men bir tilek aıtaıyn. Bul meniń jeke pikirim.
Nursultan Ábishuly!
Saılaý bitti. Taqqa taǵy da otyrdyńyz.
Endigi jerde ózińiz aıtqan reformalardy dereý qolǵa alyńyz! Ásirese, saıası reforma, zańdar men Ata Zańǵa ózgertý sekildi mańyzdy sharýalarǵa basa kóńil bólińiz. Qoǵamda qalyptasqan pikir-oıdy alýandyǵyn eskerip, meılinshe keń qamtyńyz, óıtkeni osy jyldar ishinde ózin ne bılikte, ne opozısıada kórgisi kelmeıtin jańa kúshter men tulǵalar qalyptasyp qaldy.
Saıası ólimderdiń shyndyǵyn ashý, táýelsiz BAQ qýdalaýdy doǵarý sekildi sharýalar kezek kúttirmeıtini anyq.
Osy jyldary mańaıyńyz órkenıetti de zań aıasynda qyzmet jasaı alatyn saıası opozısıanyń byt-shytyn shyǵardy: birin qýdalady, birin - ózine beıim qylyp aldy. Ol partıalarǵa el senbeıdi. Al resmı opozısıa bolmaǵan soń, bılikke syn aıtýshylar beıresmı, zańnan tys alańǵa shyǵyp ketip jatyr. Ol bolsa, ekstremızm men terorızm, radıkalızm men bitispeýshilikke ulasýda! Sondyqtan da bizge jasandy emes, shynaıy, ókimetke balama usynys aıta alatyn, eń bastysy, el Táýelsizdigin tý etip ustaı alatyn, sol úshin janyn bere alatyn saıası kúsh kerek! Sol jaǵyn da oılańyz. Iaǵnı qoǵamda qalyptasyp kele jatqan sol kúshterge qysym jasalmaýy tıis!
Bergen ýádeńiz sol baıaǵy sheneýnikterdiń qoly men quzyrynda qalyp, baıansyz bop ketpesin!
Jańa merzimińiz alda tur. Osy kezeńde mańaıyńyz kezinde elge syıdyrmaı, syrtqa ketip qalǵan myqty qazaqtardy elge qaıtarsańyz. Óz baýyrlaryńyz ǵoı, keıbiri tipti balalaryńyzben jasty emes pe? Ol bir saýapty is bolar edi. Qoǵam ol bastamańyzdy sózsiz qoldar edi.
Alda parlamenttik saılaý. Qoǵamda bar barlyq saıası kúshterdi sonyń qúramyna nege engizbeske? Alýan-túrdi pikir qazany bop, qaınap jatsyn! Barshamyz zárý bop júrgen aqıqat sol qazanda pispeı me?
Aıtpaqshy, Konstıtýsıa boıynsha otstavkaǵa ketetin úkimetińizdi de bir silkilep alsańyz! Áıtpese, Siz tapsyrma bermeseńiz, jumys isteı almaıtyndar tolyp júr ishinde. Bizge jańasha, zaman talaptaryna saı, elmen jumys isteı alatyn, jaýapkershilikti moınyna alatyn Úkimet kerek! Belgili bir kezeńge baǵdarlama jasap, sony ýaqytynda oryndaı almasa, óz erkimen otstavkaǵa ketetin úkimet kerek!
Bılik ınstıtýttary jańarsa, qoǵam da jańarary sózsiz!
Ázirshe osy.
PS. Bul meniń ǵana tilegim. Opozısıadaǵy basqalar ózgeshe oılaýy múmkin. Bizde qalyptasqan jaǵdaıda bul pikirim prezıdentke jetedi jáne ol oǵan qulaq asady degenge sene qoımaımyn. Biraq meniń pozısıamdy qoǵam bilsin degen oımen jazyp otyrmyn.
Ámirjan Qosanov
