Álemde qylqalam sheberleriniń qanshama qaıtalanbas týyndylary bar. Olardyń arasynda quny mıllıard dollarǵa deıin baratyn kartınalar men qunyna baǵa jetpes  ǵajap dúnıeler de jeterlik. Al keıbir boıaý men qylqalam arqyly qıalyndaǵy beıneni qaǵazǵa túsirgen sýretshilerdi tek bir ǵana týyndysy arqyly álem tanıdy. Degenmen, tarıh jáne óner salasynda ǵylymı dárejeńiz bolmasa, adamzat tarıhyndaǵy tanymal sýretshiler men olardyń aıryqsha qoltańbasyn bir kórgennen ajyratý qıynǵa soǵady.  Qamshy.kz aqparat agenttigi oqyrmanǵa kartınalar arqyly olardyń áıgili avtorlaryn ońaı ajyratýǵa kómek bolatyn jeńil, kóńildi ári qyzyqty keńesterdi usynady. Bul detaldar – avtordyń barlyq týyndysyna tán negizgi erekshelikter.

Pıter Paýl Rýbens – ataqty golandıalyq sýretshi, dıplomat, kolleksıoner. Búginde álemniń ár túkpirindegi mýzeıler men gallereıalarda onyń 3000-nan astam týyndysy bar. Biraq, qanshama sýrettiń ishinen Rýbenstiń kartınasyn qalaı ajyratýǵa bolady? Ol úshin mynandaı detalǵa mán berińiz. Eger sýrette bir qaraǵannan-aq erler tipti, áıelderdiń minsiz symbatqa mán bermeıtini anyq baıqalyp tursa, tolyq deneli ári jalańash birneshe adam qatar beınelense, Rýbenstiń qoltańbasy ekenine kúmánińiz bolmasyn.

Pıter Breıgel – nıderlandyq sýretshi. Onyń týyndylary Nıderland renesansynyń shyńyna aınalǵan. Pıter Breıgelge Starshıı ıaǵnı, Úlkeni degen ataý tegine qosyp aıtylady. Sebebi, onyń úlken ulynyń da esimi Pıter Breıgel (Kishi), sonymen qosa, kishi uly Ian Breıgel de ataqty sýretshiler. Peızaj ben janrlyq úlgilerdiń sheberi Úlken Pıter Breıgeldiń kartınalarynda ádette, shaǵyn qalashyqtyń turǵyndary túgeldeı ortalyq alańǵa jınalǵandaı áser qaldyrady. Sol jıyndy tóbesinen qarap turyp beınelegendeı kórinetin Breıgeldiń týyndysynda adamdar óte usaq, kóp ári olar qarbalas tirshilikpen aınalysyp jatqandaı...

Golandıanyń taǵy bir ataqty sýretshisi Ieronım Bosqtyń da kartınalary Pıter Breıgelge uqsas keledi. Degenmen, Bosqtyń sýretterindegi óte kóp kishkentaı adamdar kóbinese shaǵyn qalashyqta emes, belgisiz jazyq dalada nemese qaraýytqan jer astynda jınalatyn sıaqty. Oǵan qosa, olar shynaıy ómirden alystaý túsiniksiz zattar men  birtúrli ǵımarattardyń janynda beınelenedi.

Rembrandt Harmens van Reın – esiminiń ózi bir shyǵarmaǵa tatıtyn golandıalyq jıvopıs óneriniń altyn dáýirinde ómir súrgen jaryq pen kóleńke úılesimin beıneleýdiń uly sheber sýretshisi. Onyń týyndylarynyń basym bóligi - portretter. Al portretterdegi beıneniń keıipkerleri úısiz-kúısiz júrgen adam sıaqty kórinse ári olardy sham jaryǵymen qarap turyp salǵandaı áser qaldyrsa, onyń avtory ataqty Rembrandt ekenin bile júrińiz.

Eger kartınada shynyqqan shymyr deneli er adamdar qarapaıym úı sharýasyndaǵy áıelderdiń janynda úılesim taýyp tursa, onda onyń avtory – Mıkelandjelo dı Lodovıko dı Leonardo dı Býonarrotı nemese jaı ǵana ataqty ıtalıalyq sýretshi Mıkelandjelo ekenin umytpańyz.

Kartınanyń keıipkerlerin bı úırený sabaǵynda nemese balerınalar óner kórsetip turǵanda beınelegen – Fransıanyń ataqty qylqalam sheberi Dega. Onyń tolyq esimi – Iler-Jermen-Edgar de Ga. Aqsúıekter otbasynda dúnıege kelgen ol minsiz beıneler men sýrettegi qımyldardy tiri etip kórsetý úshin kóp eńbektengen. Onyń osy perfeksıonızmge degen qushtarlyǵynyń arqasynda Dega kóshirip salǵan ataqty sýretshilerdiń kartınalaryn túpnusqadan ajyratý qıynǵa soqqan.

Ispan renesansynyń ókili, ataqty sýretshi, músinshi-arhıtektor El Grekonyń kartınalarynda uqypty kıingen saqal-murty qoıylǵan, bet-beınesi tik er adamdar beınelenedi. Sondaı-aq, onyń kartınalarynan qoltańbasy retinde grek áripterimen jazylǵan óziniń negizgi esimin, ıaǵnı Domenıkos Teotokopýlos degen sózdi baıqaýǵa bolady.

Ian van Eık – Hİİ ǵasyrda ómir súrgen portret salýdyń sheberi, júzden astam kartınanyń avtory. Bir qyzyǵy, onyń sýretterin ajyratý óte ońaı bolýy múmkin. Sebebi, portretterdegi meıli er adam bolsyn, meıli áıel adamnyń bolsyn, túri qazirgi Reseı Federasıasynyń prezıdenti Vladımır Pýtınge qatty uqsaıdy.

Eń ataqty ári esimi eń uzaq qylqalam sheberleriniń biri – Pablo Dıego Hose Fransısko de Paýla Hýan Nepomýseno Marıa de los Remedıos Sıprıano de la Santısıma Trınıdad Martır Patrısıo Rýıs nemese jaı ǵana Pıkasso. Teatr sýretshisi, keramıka sheberi ári dızaıner Pablo Pıkassonyń týyndylarynda adamnyń bet-júzi óte kúrdeli ózgeriske ushyraǵandaı kórinedi. Onyń ústine túrli-tústi beıneler. Pıkasso kartınalarynda adamnyń kózi, murny, aýzy ádettegiden bólek, ózgeshe ornalasqan.

Al eger ataqty mýzeılerden quny mıllıon dollarlyq bir qaraǵanda Excel baǵdarlamasymen oryndalǵan sekildi túrli-tústi teksheler, tórtburyshty geometrıalyq pishindermen salynǵan kartına kórseńiz, onyń avtory –Pıter Kornelıs Mondrıan. Onyń barynsha abstraksıalyq qoltańbasy beıneleý óneriniń ózindik syryn ózgeshe beıneleýdiń bir kórinisi ispettes.

Árıne, muny ónertaný sabaǵy deýge kelmes. Degenmen, óner týyndylaryn ońaı ajyratýǵa arnalǵan barynsha qyzyqty ári jeńil keńes deýge ábden bolady.