Fransıa prezıdenti eýropalyq Qarýly Kúshter soǵys aıaqtalǵannan keıin Ýkraınadaǵy bitimgershilik operasıalaryna qatysýy kerek dep málimdedi. Bul týraly ol keshegi Vashıngtonda ótken jýrnalısermen kezdesýde aıtty. 

"Bizge myqty ýkraınalyq ásker qajet bolady jáne biz Ýkraınaǵa kómektesýimiz kerek", dedi Makron. 

Reseı tarapy bolsa Ýkraına aýmaǵynda Batys áskerlerin ornalastyrý ıdeıasyna qarsy. Makron kelissóz sátsiz aıaqtalǵan jaǵdaıda Reseıge qarsy sanksıany kúsheıtý keregin aıtty. 

"Biz sanksıany kúsheıtý kerek dep oılaımyz. Kez kelgen jaǵdaıda Reseıge qarsy qysymdy kúsheıtetin pozısıany ustanýǵa týra keledi", dedi Emmanýel Makron. 

Budan bólek Fransıa prezıdenti Vladımır Zelenskıı jáne basqa da eýropalyq lıderlermen ótken "Eriktiler koalızasıasy" (saıası sıpattaǵy belgili bir maqsatqa jetý úshin qurylǵan ýaqytsha halyqaralyq seriktestik - Red.) vıdeokonferensıasynan keıin málimdeme jasady:

"Eger Reseıdiń aldynda álsizdik tanytatyn bolsaq aldaǵy ýaqytta da qaqtyǵysqa jol ashady. Biz búgin álsiz bolsaq, erteń munyń zardabyn tartatyn bolamyz. Eger Eýropa erkin ári táýelsiz bolǵysy kelse qazir de myqty ári basqalarǵa úreı salatyn kontınent  bolýy kerek", dedi Fransıa prezıdenti. 

Budan bólek Makron qalǵan aýmaqtyń qaýipsizdigine kóz jetkizbeı turyp Reseı men Ýkraınanyń aımaqtyq almasý shartyn jasasýyna eshbir memleket kelisim bermeıtinin aıtty.