Jańaózendegi jumysshylar narazylyǵynan habar taratyp júrgen Azattyq tilshisi Sánıa Toıken ustaldy. Jýrnalısiń ustalǵany týraly «sol sátte qasynda boldym» degen qala turǵyny Gúlnar Táńirbergenova habarlady. Onyń sózinshe, Toıken ekeýin 11 naýryzda keshkisin qaladaǵy dámhanalardyń biriniń aldynda polıseıler ustap áketken. Bul týraly Qamshy.kz aqparat agenttigi Azattyq radıosynyń deregine súıenip habarlaıdy. 

12 naýryzda tańerteń polısıadan shyqqan Táńirbergenova «Sánıa Toıkendi polısıa ishke alyp ketti. Sodan beri odan habar joq» deıdi.

Mańǵystaý oblystyq polısıa departamenti jýrnalısiń ustalýyna qatysty áli pikir bildirmedi.  

Táńirbergenovanyń Azattyqqa aıtýynsha, Toıken ekeýi dámhananyń bir buryshynda sóılesip otyrǵanda sonda otyrǵan birneshe azamat tóbelesip qalǵan. Sálden soń ákimshilik kafeniń jabylǵaly jatqanyn aıtqan.

Birshama ýaqyttan soń tóbeles bolǵan jerge kelgen polısıa jasaǵy Sánıa Toıken men Táńirbergenovany ustap áketken.   

«Polıseıler «tóbeles bolǵan jerde boldyńyzdar, bizben júrińizder» dedi. Qarsylyǵymyzǵa qaramastan, bizdi bólek kólikke otyrǵyzda da, bólimshege alyp ketti» deıdi Táńirbergenova.

Sánıa Toıkenniń sońǵy bir aıda osymen úshinshi ret ustalyp otyr.

27 aqpanda Jańaózendegi jumysshylar narazylyǵynan habar taratýǵa ketken Azattyq tilshileri – Toıken men vıdeooperator Sanat Nurbekovti polısıa ustap, Aqtaý qalalyq departamentine jetkizgen. Olarǵa protokol kórsetpesten tergep, alty saǵat ustaǵan soń bosatqan.

Polısıa ol kezde «ustaýǵa Shaýdırova esimdi azamattyń aryzy sebep boldy» degen.

12 aqpanda Astanada Toıkendi birneshe anadan suhbat almaq bolyp, olardyń úıine barǵanda polısıa basqarmaǵa alyp ketken. 

1 naýryzda Eýropadaǵy qaýipsizdik pen yntymaqtastyq uıymynyń (EQYU) baspasóz erkindigi jónindegi ókili Arlem Dezır 27 aqpanda Almaty, Jańaózen jáne Oral qalalarynda birneshe jýrnalıs pen blogerdiń ustalýyna baılanysty alańdaýshylyq bildirgen. 

EQYU ókili málimdemesinde «jýrnalıserdiń kásibı mindetin oryndaýǵa kedergi etetin az ýaqytqa ustaý tájirıbesine alańdaıtynyn» aıtqan. Onyń sózinshe, «áleýmettik narazylyq pen qoǵam úshin mańyzdy máselelerdi kópshilikke jetkizý mindetin atqarǵan jýrnalıs kásibı jumysy úshin jazalanbaýy tıis».

Usynǵan: Gúlim Jaqan