Almatydaǵy alyp tıinniń taǵdyry sáýir aıynda sheshiletin boldy, - dep habarlaıdy Qamshy.kz aqparat agenttigi "Almaty" telearnasyna silteme jasap.

Bıiktigi 4 qabatty úımen birdeı tıindi jasaýǵa 15 tonna temir men bolat, 3 tonna aǵash jáne 3 tonna saban jumsalǵan. Joba avtory – brıtandyq sýretshi Aleks Rınsler óziniń mundaı óner týyndylaryn ýaqyty kelgende órtep jiberedi eken. Bul joly músin qala ortasynda ornalasqandyqtan, avtor ony órtemeımin dep sheshipti. Art-nysandy buzbaýy da múmkin. Tek bet-beınesin ǵana ózgertip, ornynda qaldyrýy ǵajap emes. Al Naýryz merekesine oraı tıin jańa keıipke enip, túrlenbek.  

Basynda taqıasy, al qolynda raýshan gúli bar alyp tıinniń mańaıynda 22 naýryz kúni almatylyqtar men qala qonaqtary naýryz merekesin toılamaq. Al art-nysannyń endigi taǵdyry sáýir aıynda belgili bolmaq.

Telearnanyń málimetinshe, Naýryz merekesinde alyp tıinniń janynda túrli jármeńkeler men sheberlik synyptary ótedi. Sondaı-aq, qala turǵyndary ulttyq taǵamdardan dám tatyp, keshki saǵat 9-da arnaıy otshashýdy tamashalaı alady. 

Atyshýly art-nysannyń búgingi beınesi osyndaı. Keı jerleriniń sabany túsip, tesilip qalǵan tustary da anyq kórinip tur. Alǵashynda 9 aı ǵana turady degen músinniń Atakent kórme ortalyǵynda turǵanyna 8 aıǵa jýyqtady. Alyp tıinniń ábden kirlegenin turǵyndar da baıqaǵan.

«Tıindi tazalap alǵan durys shyǵar. Eń bolmasa, mereke kúnderine qarsy tazalaý qajet qoı», «Sýretine qaraǵanda birshama eskileý kórinedi eken. Biraq sonda da ádemi, qalaǵa kórik berip tur», «Kirin tazalap alsa, kelýshilerdiń kóz qýanyshyna aınalar edi...», – desti alyp tıin mańynda serýendep júrgen qala turǵyndary.

Kóptiń kózi úırenip qaldy ma, kóbisi tıindi alyp tastaýǵa qımaıdy. Tek tazalap qoısa degen tilekteri bar. Al Alesá Nýgaeva músindi sabannan jasaýdaǵy bastapqy maqsat – qalanyń ekologıalyq ahýalyn kórsetý edi deıdi.  

«Sýretshiniń maqsaty – art-nysandy sabannan jasaý arqyly qalamyzdaǵy ekologıalyq jaǵdaıdy, aýanyń qanshalyqty las ekenin kórsetý edi. Ózderińiz de kórip turǵandaı, qorshaǵan ortanyń áserinen tıinniń qalaı ózgergenin ańǵarýǵa bolady», – dedi «Nowryz Rarty» festıvaliniń jetekshisi Alesá NÝGAEVA.

«Tıin az ýaqyt ishinde kópshiliktiń súıikti músinine aınalyp úlgerdi. Onyń aınalasynyń ózi jańa keıipke enip, halyq kóp jınalatyn orynǵa aınaldy. Biz bul jerdiń budan keıin de turǵyndardyń demalatyn orny bolyp qalǵanyn qalaımyz», – deıdi Alesá Nýgaeva. 

Usynǵan: Maqpal Sembaı