Senat depýtaty Nurlan Qylyshbaev aýdan jáne aýyldarda memlekettik qyzmette jumys isteıtin turǵyndardyń 7-20-25" baǵdarlamasyna qatysa almaı otyrǵanyn aıtty dep habarlaıdy Qamshy.kz aqparat agenttigi sputniknews-tyń deregin negizge ala otyryp.

QR Indýstrıa jáne ınfraqurylymdyq damý mınıstrligi qurylys jáne turǵyn úı-kommýnaldyq sharýashylyq isteri komıteti tóraǵasynyń orynbasary Baqytjan Qashaqov "7-20-25" baǵdarlamasyna qatysý úshin aılyq tabys shamamen 150 myń teńgeden asýy qajet ekenin atap ótti.

 "Olar elimizdiń kez kelgen óńirinen quny 25 mıllıon teńgege deıingi jańa salynǵan páterdi satyp ala alady", - dedi ol.

Alaıda depýtat Nurlan Qylyshbaev munymen kelispeıtinin jetkizdi.

"Komıtet bergen aqparatpen kelise almaımyn.  Óńirlerde 150 myń teńge jalaqymen páter alatynyna kúmánim bar", - dedi ol.

Onyń aıtýynsha, eki balasy bar otbasynyń tek 12 mıllıon teńgeniń páterin alýǵa shamasy jetedi.

"Bankter otbasynyń taza tabysyn esepteıdi. Turǵyndardyń ekinshi deńgeıli bankterde qaryzy bolmaýy kerek. Baǵdarlamada ıpotekalyq zaem dep jazylǵanymen, bankter basqa qaryzdardyń bolmaýyn jáne kredıt tarıhynyń jaqsy bolǵanyn talap etedi. Bul – bankter qoıatyn negizgi talap", - dedi Nurlan Qylyshbaev.

Depýtat aýdandyq balabaqshadaǵy jas tárbıeshi 50 myń teńge, al kategorıasy bar tárbıeshi 70 myń teńge, balabaqsha meńgerýshisi 100 myń teńge jalaqy alatynyn aıtty. Sondaı-aq, onyń aıtýynsha,  aýdandyq deńgeıdegi jetekshi ákimdik qyzmetkeriniń jalaqysy 55 myń teńge, bas maman 55 myń teńge, eńbek ótili joq bólim basshysy 125 myń teńge, eńbek ótili joǵary bólim basshysy 190 myń teńge kóliminde tabys tabady.

"Qarapaıym mekteptegi kategorıasy joq muǵalimniń jalaqysy 50 myń teńge, joǵary kategorıaly bir stavkada jumys isteıtin ustazdyń jalaqysy 90 myń teńge, joǵary kategorıaly 1,5 stavkadaǵy pedagog 150 myń teńge alady. Al kategorıasy joq dáriger 56 myń teńge, joǵary kategorıaly dáriger 77 myń teńge, kezekshilikti eseptegende kategorıasy joq dáriger 77 myń teńge, joǵary kategorıaly dáriger 119 myń teńge alady" dep tizip shyqty Nurlan Qylyshbaev.

"Sondyqtan aýyldyq jerlerdegi turǵyndardy baspanamen qamtamasyz etýdiń jańa jolyn izdeý kerek. Biz atalǵan baǵdarlamaǵa qandaı áleýmettik toptar qatysyp jatqanyn bilgimiz keledi. Óńirlerdegi turǵyndardyń tólem qabileti bankterdiń talabyna sáıkes kelmeı otyr. Kóptegen turǵynnyń kredıt tarıhy nashar", - dep túıindedi sózin depýtat.

Usynǵan: Farıza Jomartqyzy