Vıse-mınıstrdiń aıtýynsha, ataýly áleýmettik kómek týraly zańda jeke sharýashylyqty kiris retinde sanap-sanamaýdy jergilikti atqarýshy organdar ózderi sheshedi.

Eńbek jáne halyqty áleýmettik qorǵaý vıse-mınıstri Svetlana Jaqypova otbasynyń jıyntyq tabysyn eseptegen kezde jeke sharýashylyqty esepke alý máselesine qatysty túsinikteme berdi, dep habarlaıdy Qamshy.kz aqparat agenttigi Sputnik Qazaqstan saıtynyń deregine súıenip.

"Sharýashylyqqa qatysty saýaldar jıi qoıylady. Negizi ataýly áleýmettik kómek týraly zańnyń 7-babynda jergilikti atqarýshy organdar jeke sharýashylyqty kiris dep sanaý-sanamaýdy ózderi sheshetini kórsetilgen. Olardyń sondaı quqyǵy bar", - dedi Jaqypova májilis kýlýarynda.

Ol qazirgi tańda respýblıkada tek bir ǵana oblys qoradaǵy tórt túlikti esepke almaıtynyn atap ótti. Alaıda onyń qandaı óńir ekenin naqtylamady. 

"Aldaǵy ýaqytta bul máselelerdiń barlyǵy qaıtadan qaralyp, negizgi sheshimder qabyldanady. Jumys júrgizilip jatyr", - dep sendirdi Jaqypova.

Qoradaǵy maldy otbasynyń kirisi dep esepteý qanshalyqty durys degen saýalǵa mınıstrdiń orynbasary sıyr ustaıtyn eki kórshini mysal etip, jaýap berdi.

"Máselen, eki kórshini alaıyq. Bireýi 20 sıyr ustaıdy, balalaryna etin jegizip, sútin ishkizip asyrap otyr. Al qasyndaǵy kórshisi sıyrlary joq, ony satyp alýǵa jaǵdaıy da joq. Biraq járdemaqy taǵaıyndaǵan kezde, ekeýi de sol kómekke iligedi. Birneshe sıyr ustaıtyn otbasy da balalaryna 21 myń teńge alady, birde-bir sıyry joq kórshisi de dál sondaı járdemaqy alady. Sonda aıtyńyzshy, osy ádiletti me?", - dedi vıse-mınıstr.

Usynǵan: Nazerke Labbıhan