AQSH prezıdenti Donald Tramp Efıopıa men Indonezıadaǵy ushaq apatynan soń Boeing 737 Max 8 jáne Max 9 ushaqtarymen qatynaýǵa tyıym saldy.

Osydan keıin Boeing aksıalarynyń baǵasy 2%-ǵa tómendegen.

Avıakompanıa prezıdenttiń sheshimin qoldap, Fınlándıa avıasıalyq ákimshiligine osy jelidegi barlyq ushaqtardyń ushýyn ýaqytsha toqtata turǵany jón ekenin aıtty.

«Kompanıa Boeing 737 Max qaýipsizdigine tolyqtaı senimdi. Biraq amerıkalyq Federaldyq avıasıalyq ákimshiliktiń (FAA) konsýltasıasynan keıin Federaldy organ búkil álemdegi uzyn sany 371 Boeing 737 Max ushaǵynyń  búkil flotynyń ushýyn ýaqytsha toqtata turýdy usyndy»,  dep habarlady Boıng.

AQSH-ta Boeing 737 Max áýe kemelerin United Airlines, American Airlines jáne Southwest Airlines kompanıasy paıdalanady.

Esterińizge sala keteıik, 10 naýryzda Efıopıa avıakompanıasy Addıs-Abebadan Naırobıge ushyp bara jatqan  Boeing 737 Max 8 ushaǵy Efıopıa astanasynan 60 shaqyrym jerde apatqa ushyraǵan. Ushaq apatynda 35 elden 157 adam qaza tapty.

Al 2017 jyly qazan aıynyń aıaǵynda Indonezıalyq Lion Air kompanıasynyń Boeing 737 Max 8 Djakarta áýejaıynan kóterilgennen keıin kóp uzamaı Java teńizine qulaǵan bolatyn. Bortta bolǵan 189 adam qaıtys bolǵan.

Efıopıadaǵy apattan keıin kóptegen el birden Boeing 737 Max 8 reısterin toqtatty. Atap aıtqanda, Eýropa avıasıalyq qaýipsizdik agenttigi (EASA) Eýropadan ushýǵa tyıym saldy.

AQSH apattan soń Boeing 737 Max 8 ushaǵyn paıdalanýdy jalǵastyrǵan sońǵy elderdiń biri bolatyn.

Sondaı-aq Kanada úkimeti sársenbi kúni Boeing 737 Max 8 ushaqtaryn toqtatýǵa sheshim qabyldady. Kanadanyń úsh áýe kompanıasy, álem boıynsha 19 memlekettiń avıakompanıalary Boeing 737 Max ushaǵyn paıdalanady.

Donald Tramp pen Azamattyq avıasıa organynyń sheshiminen keıin American Airlines jalpy sany 24 Boeing 737 Max ushaǵynyń reısterin toqtatty.

Qazir AQSH pen Kanadadan basqa, Ulybrıtanıa, Eýropalyq Odaq, Qytaı, Avstralıa, Úndistan jáne kóptegen basqa elderde Boeing 737 Max ushaǵyn paıdalanýǵa tyıym salynǵan.

AQSH-tyń ushqyshtary «Boeing 737 Max» ushaǵyn basqarý keıde qıyndyq týǵyzatynyn birneshe ret málimdegeni anyqtaldy.

Qarashada amerıkalyq eki ushqysh bılikke Boeing 737 Max avtopılotynyń problemalary týraly habarlaǵan.

Inspektorlar apat ornynan «qara jáshikti» tapqan. Qazir apat sebepterin anyqtaýǵa tyrysýda.

Indonezıadaǵy Lion Air apatynan keıin, Boeing áýe kemesiniń sensorlary kemeniń ushý buryshy týraly burys derekter jazsa, ushqyshtarǵa ne isteý kerektigi jóninde nusqaýlar taratqan.

Amerıkalyq ushqyshtyń aıtýynsha, osydan soń kompanıa dachıkterdiń durys jumys isteýine asa mán bermegen.

Saltanat Shynádil