Energetıka vıse-mınıstri Sábıt Nurlybaı Jaıyq ózeniniń betine qalqyp shyqqan ólgen balyqtardy dereý jınap, joıyp jiberý kerektigin aıtty, dep habarlaıdy Qamshy.kz aqparat agenttigi Sputnik Qazaqstan saıtyna silteme jasap.

Byltyr jeltoqsanda Jaıyq ózeninde balyqtardyń jappaı qyrylýyna baılanysty arnaıy vedomstvoaralyq komısıa qurylǵan bolatyn. Komısıa tóraǵasy – energetıka mınıstriniń orynbasary Sábıt Nurlybaı. Búgin Nurlybaı bastaǵan komısıa músheleri jaǵdaıdy óz kózimen kórý úshin Atyraý oblysyna arnaıy kelgen.

"Qazir kún jylynyp, Jaıyq ózeniniń muzy erip jatyr. Sondyqtan ólgen balyqtar sý betine qalqyp shyǵýda. Búgin biz katerge otyryp, Damby aýylyn bardyq. Ózimizben birge súńgýirlerdi de aldyq. Olar ózenniń túbin vıdeoǵa túsirdi. Sebebi, sizder bilesizder, keıbir BAQ ózen túbinde qyrylǵan balyqtar óte kóp dep habarlaǵan edi. Biz sý túbinde ólip jatqan balyq kórmedik. Sol jerde sýdyń quramy men sapasyn tekserý úshin synama aldyq", - dedi ol brıfıńte.

Sonymen qatar, olar ózen jaǵasynda balyq aýlap otyrǵan balyqshylarmen de sóılesken.

"Ózderi aýlaǵan balyqty kórsetti, mine, balyq bar deıdi", - deıdi vıse-mınıstr.

Nurlybaı qazirgi tańda ózennen jınalǵan 101 tonna óli balyq joıylǵanyn atap ótti.

"Bul, árıne, jaqsy. Biraq ózen jaǵasynda ıisi shyqqan balyq jetkilikti. Sondyqtan ákimdikter, eriktiler men kooperatıv ókilderi birlesip, ólgen balyqtardy jınap, der kezinde joıýy qajet. Sol kezde azamattar da alańdamaıdy. Sondyqtan ákimdik sol balyqtardy jınap, joıý boıynsha jedel sharalar qabyldaýy kerek", - dedi mınıstrdiń orynbasary.

Ol ákimdik ǵylymı zertteýlerge qarjy bólip otyrǵanyn aıtty.

"Biz zertteýlerdiń qalaı júretinin baqylap, keıin halyqqa Jaıyq ózenindegi jaǵdaı boıynsha aqparat beremiz", - dep sendirdi Nurlybaı.

Usynǵan: Nazerke Labıhan