Tańerteńgi saǵat 9-dan asqan ýaqyt. Jumysqa asyqqan jurt nópiriniń saıabyrsyǵan sáti. Elorda shetinen qalaǵa qatynaıtyn avtobýs baǵdarshamnyń qyzyl túsine toqtap turǵan ózge kólikke kelip soǵylady. Araǵa biraz sekýnd salyp, soqqyǵa tap bolǵan basqa mashınadaǵy adamdar avtobýsqa jaqyndaı bastady.

Avtobýs aldymen ózge qoǵamdyq kólikpen soqtyǵysqan. Eki ortada janshylyp qalǵan sońǵy jolaýshynyń denesi qutqarýshylar men kómekke kelgen azamattardyń qolymen shyǵarylyp jatyr. Bul týraly Qamshy.kz aqparat agenttigi Eýrazıa birinshi arnasynyń deregine súıenip habarlaıdy.

Dál qazirgi ýaqytta jaraqat alǵandardyń barlyǵyn jedel járdem kólikteri aýrýhanalarǵa alyp ketken. Qazir joldy avtobýstardan bosatý jumystary jalǵasyp jatyr.

Oqıǵa ornyna jedel járdemniń jıyny 15 brıgadasy kelgen. Sońǵy aqparat boıynsha, 2 adam kóz jumdy. 36 adam jaraqat aldy. 7 azamat aýyr jaǵdaıda. Olardyń ómiri úshin dárigerler kúresýde. Záýresh Ótemisova soǵylǵan avtobýstyń ishinde bolǵan eken. Aýyr soqqydan murny synǵan.

«Ádettegideı jumysqa bara jatqanmyn. Avtobýs ishi apat kezinde jartylaı bos bolǵan. qolymmen betimdi jaýyp qana úlgerdim. Bir sátke esimnen tanyp qalyppyn. Kózimdi ashsam, adamdar aıqaılap, shýlap jatty», - deıdi Záýresh Ótemisova.

Kóz jumǵandardyń biri 301-shi baǵyttaǵy, jyldamdyqpen kelip soǵylǵan avtobýstyń júrgizýshisi, 53 jastaǵy Abaı Ospanov. Ekinshisi 24-tegi jolaýshy Aızat Nýrekenova. 

«Bul áreket QR QK 345 baby boıynsha, ıaǵnı, jol júrý erejesin óreskel buzyp, osynyń saldarynan 2 jáne odan da kóp adamdardyń ólimine ákep soqqan bap boıynsha sotqa deıingi tergep-tekserý jumystary bastalyp6 saraptamalar taǵaıyndalady, onyń ishinde sot-medısınalyq saraptama, avtotehnıkalyq saraptama», dep málimdedi qalalyq Polısıa departamentiniń baspasóz-hatshysy Sofá Qylyshbekova.

Tilshi: Kameraǵa túsip qalǵan beınege qaraǵanda avtobýs tejegishin baspaǵandaı kórinedi. Avtobýstyń tehnıkalyq jaǵdaıy qalaı bolǵanyn bilmek bolyp avtoparkke bettedik. Ondaǵylar 2014 jyly shyǵarylǵan qoǵamdyq kólikte min bolmaǵan dep otyr.

«Tolyqtaı barlyǵyn mehanık tekserip, pechatin qoıyp bergen ǵoı.  Kúndelikti tekseriledi me?  Kúndelikti tekseredi, keshke kirgende jáne tańerteń.  Avtobýstyń tormozy ustamaı qaldy degen boljam, múmkin be?  Joq, bul jerde múmkin emes», - dedi avtopark mehanıgi Meıram Musaev.

Tilshi: Taǵy bir boljam, júrgizýshiniń densaýlyǵy syr berýi múmkin. Abaı Ospanovtyń 9 jyldaı tájirıbesi bar. Avtoparkke eki jyl buryn kelipti. Qyzmette de, densaýlyǵynda da min bolmaǵan, qujat boıynsha.

«Júrgizýshi tańǵy saǵat 6-30-da medısınalyq tekserýden ótken. Densaýlyǵynda min bolmaǵan. Eger ózi jaısyz sezinse, reıske shyqpaýshy edi. Jyl saıynǵy tekserýden sońǵy ret 4 aı buryn ótti. Jumysqa jaramdy degen qorytyndy bar», dep aıtty "Astana LRT"  kompanıasynyń basqarma tóraǵasy Bekmyrza Igenberdınov.

Avtopark basshylyǵy júrgizýshi merekelik demalystan soń jumystaǵy ekinshi kúnine kirisken deıdi.

Oqıǵanyń naqty sebebin endi tártip saqshylary anyqtaıtyn bolady. Mert bolǵan avtobýs júrgizýshiniń artynda 4 balasy qalǵan eken. Týystarymen tildeskenimizde, ol kezinde Chernobl apatynyń saldarymen kúreske qatysqanyn bildik. Al qapyda kóz jumǵan jolaýshy Aızat bir balanyń jalǵyzbasty anasy bolypty.

Usynǵan: Nazerke Labıhan