Memleket  - bireý. Elde - eki prezıdent. Naýryzdan keıingi kóńil kúı áli eleń - alań. Aldaǵy eki -úsh aı kimniń kim ekenin anyq kórseter. Biraq...

Qaı prezıdentke qararymyzdy bilmeı qaldyq qoı.

Anyǵy, tuńǵyshtyń ókilettiligi óte joǵary. Qyzmetten ketkende bireý jylady, ekinshileri «endi qalaı bolar eken?» dep alańdady.

Eshnárse de bolmaıdy! Tirshilik burynǵy júıeniń ádetimen ári qaraı jalǵasa beredi. 

19 naýryz kúngi saǵat 19.00-degi málimdeme halyqty ári-sári kúıge túsirgeni ras. Biraq bári kelisimmen aldyn ala júzege asyrylǵan. Aqıqaty, Nazarbaev úshin qazir Toqaevtyń artyq abyroıly kandıdatýra joq. Kóptegen  sarapshylar Qasym-Jomart Kemelulyn qyrǵyzdyń Roza Otynbaevasy sekildi  ótpeli kezeńniń prezıdenti retinde kóredi. Olaı emes. Óıtkeni Toqaevtyń prezıdenttikke kelýi aldymen Tuńǵysh Prezıdent úshin de, el úshin de tıimdi. Reseı men Qytaı úshin de Toqaevtyń kandıdatýrasy durys.  Al ózge adam kelýi ekitalaı. Qazir bazbir toptar nemese sarapshylar men birqatar jýrnalıser qaýymy keleshek saılaý úshin Prezıdenttiń týysqandaryn, aǵaıyndary men onyń qyzy Darıǵanyń esimin kóbirek ataýda. Bulaı bolýy logıkaǵa syımaıdy. Eldiń tynyshtyǵy úshin, qoǵamnyń turaqtylyǵy úshin Tuńǵysh prezıdent mundaı qadamǵa barmaýy kerek. Biraq...

Ol úshin ótpeli prezıdenttik kezeń tusynda Qasym-Jomart Toqaev el qalaıtyn qadamdardy júzege asyra alýy tıis. Másele osynda. Biraq ony Tuńǵyshpen kelise otyryp jasaı ma, joq álde, óz qadamy arqyly táýelsiz sheshim shyǵara  ma? Másele osynda. Aqıqaty, Toqaevqa Nazarbaev dáýirinen túıindi máseleler qaldy. Ol túıindi kim sheshedi? Rasynda qoǵamda qordalanǵan problemalar áli jeterlik. Atap aıtsaq...

«Qazaq máselesi» áli sheshilgen joq.

Memleketqurýshy ulttyń upaıy áli túgel emes.

Memlekettiń tildiń mártebesi áli tómen.

Táýelsizdik alǵanymyzǵa 28 jyl ótse de, sybaılas jemqorlyq áli joıylǵan joq.

Jemqorlyq degen – jegi qurt. Ony qalaı uıasynda tunshyqtyra alamyz?

El qazynasyna qol suqqan jemqorlardan qalaı qutylamyz?

Zań bar, biraq nege tolyqqandy jumys istemeıdi?

Qazaq qoǵamynda zań ádiletti túrde  ústemdik qurýy úshin ne istelinýi  kerek?

Toı, dýman, ysyrapshylyqtan qalaı ada bolamyz?

Qazaq toıyna  reforma kerek. Muny qalaı retteımiz? Ózbek pen tájik  sıaqty bizge de zań qabyldaý kerek pe?

Úkimet pen Májilis jáne Senat qashan qazaqsha sóıleıdi?

Bilim salasynda nege  mentalıtetke saı emes reformalar jasala beredi?

Aılyǵy az, beıneti batpan muǵalim men dárigerdiń mártebesi qashan kóteriledi?

...Saýal kóp. Jalǵasa beredi. Biraq, kesheden kele jatqan bul túıindi kim sheshedi? Toqaev pa, Nazarbaev pa? Kimge senemiz, qaı Prezıdentke qaraımyz?!.