Ál-Farabı atyndaǵy QazUÝ rektory, akademık Ǵalym Mutanov bastaǵan ýnıversıtet delegasıasy M.Lomonosov atyndaǵy MMÝ-de (Máskeý q., RF) ótken «Ýnıversıtetter, qoǵam jáne adamzat bolashaǵy» halyqaralyq forýmyna qatysty dep jazady Qamshy.kz aqparat agenttigi ýnıversıtettiń baspasóz qyzmetiniń deregin negizge alyp. «Jańa urpaq ýnıversıteti: 4.0 traektorıasy» taqyrybyndaǵy qazaqstandyq jetekshi joǵary oqý orny basshysynyń baıandamasy forýmnyń qatysýshylary arasynda úlken qyzyǵýshylyq týdyrdy.
Forým jumysyna myńdaǵan jetekshi reseılik jáne sheteldik joǵary oqý oryndarynyń rektorlary, halyqaralyq uıymdar ókilderi, Japonıa, Fransıa, Germanıa, Ulybrıtanıa, Ispanıa, Italıa, Gresıa, Qytaı, Qazaqstan, Iran, Egıpet jáne basqa elderdiń tanymal memlekettik qaıratkerleri men sarapshylary qatysty.
Olar jahandaný dáýiri men qazirgi zamannyń syn-tegeýrinderi jaǵdaıynda joǵary mekteptterdi damytýdyń jáne ǵalamdyq ǵylymı-bilim berý, tehnologıalyq jáne gýmanıtarlyq keńistikti úılestirýde joǵary oqý oryndarynyń rólin arttyrýdyń mańyzdy máselelerin talqylady.
Forýmnyń plenarlyq otyrystary adamzattyń ǵylymı-bilim berý jáne mádenı damýyndaǵy ýnıversıtetterdiń tarıhı rólin talqylaýǵa, sondaı-aq qazirgi zamannyń jahandyq máselelerin eńserýge arnaldy.
İs-sharany asha otyryp, M.Lomonosov atyndaǵy MMÝ rektory, Eýrazıalyq ýnıversıtetter asosıasıasynyń prezıdenti, akademık V.A.Sadovnıchıı ýnıversıtetterdiń qoǵamdaǵy mańyzdy mısıasyn atap ótti. «Gýmanıtarlyq bilim berýdi barynsha damytý kerek, ol tarıh, mádenıet, ana tili jáne ónerge nazar aýdara otyryp, jahandaný jaǵdaıynda sózsiz paıda bolatyn moraldyq jáne rýhanı aýytqýlardy teńgere alady», - dedi ol.
Qazaqstannyń jetekshi joǵary oqý orny – ál-Farabı atyndaǵy QazUÝ-dyń rektory, akademık Ǵ.Mutanovtyń jańa býyndaǵy ýnıversıtet úlgisin qalyptastyrý tájirıbesi týraly baıandamasy jandy qyzyǵýshylyq týdyrdy. «Tórtinshi býyn ýnıversıtetiniń modeli halyqaralyq tájirıbe negizinde jasalǵan jáne joǵary tehnologıalyq ári rýhanı-adamgershilik platformalardyń sımbıozyna negizdelgen. Ol jas urpaqtyń álemniń azamattary retinde izgilikti jáne turaqty qoǵam qurýda áleýmettik jaýapkershiligin qalyptastyrýǵa baǵyttalǵan», - dedi rektor. Bul model QazUÝ-da «ál-Farabı - Smart City» jobasy arqyly is júzinde kórinis tabýda ekendigin alǵa tartty. Forýmnyń qatysýshylary usynylǵan úlgige qoldaý kórsetip, onyń ózektiligi men suranysqa ıe ekendigin atap ótti.
Forým aıasynda, sondaı-aq, Eýrazıalyq ýnıversıtetter asosıasıasynyń quryltaıy ótkizilip, ǵylym jáne bilim salasyndaǵy yntymaqtastyq týraly memorandýmdarǵa qol qoıyldy.
Usynǵan: Ásel Bolatqyzy
