Túrkıadaǵy túrli qaýymdastyq ókilderi Nursultan Nazarbaevtyń qyzmetten ketýin qandastardyń qalaı qabyldaǵanyn jetkizdi dep habarlaıdy Qamshy.kz aqparat agenttigi ♦sputniknews.kz saıtyna silteme jasap.
Túrkıa Salihli qazaq qaýymdastyǵy, qazaq-túrik qory jáne qazaq-túrik bilim jáne zertteý qaýymdastyǵynyń resmı ókilderi Shúkir Ali Eren, Fazyl Toply jáne Shaban Serkan Dınchtúrk Túrkıadaǵy qazaqtardyń el prezıdentiniń qyzmetinen ketý týraly sheshimine qamyǵyp otyrǵanyn jetkizdi. Dese de, bul sheshimdi Nursultan Ábishuly Nazarbaevtyń halyq pen eldiń keleshegi úshin qabyldaǵanyna senimdi ekenin aıtyp ótti.
"Qurmetti Qazaqstan Respýblıkasynyń Prezıdenti Nursultan Ábishuly! Dara da dana tulǵa Elbasymyz, atajurtymyz sizdiń kóshbasshylyǵyńyzdyń arqasynda táýelsizdigin alǵan sátten bastap kúnnen-kúnge kúsheıip, damyp keledi. Árıne, munyń barlyǵy sizdiń kóregen saıasatyńyzdyń, halqy men otanyn bárinen qymbat ta joǵary tutqan memleket qaıratkeri retinde búkil talant pen kúshińizdi sarqı jumsaýyńyzdyń arqasynda iske asty.
Qazaqstan Respýblıkasy kóp ultty memleket bolǵanyna qaramastan, sizdiń teńgerimdi saıasatyńyzdyń arqasynda elde beıbitshilik pen kelisim ornap, halyqtyń yntymaǵy jarasyp otyr. Áleýmettik-ekonomıkalyq jaǵynan damyp, elimiz qazirgi tańda Eýrazıanyń jarqyn juldyzyna aınaldy. Tipti Taıaý Shyǵys elderi arasyndaǵy kelispeýshilikti retteýde senimdi el bolyp otyr", - dep jazylǵan jedelhatta.
Sondaı-aq, Túrkıadaǵy qandastar qazaq eliniń tek óz aımaǵynda emes, búkil álemde beıbitshilik pen bıliktiń sımvolyna aınalyp otyrǵanyna toqtaldy. Nursultan Ábishuly Nazarbaev el basqarǵan jyldary dúnıeniń túkpir-túkpirindegi ár qazaq "Men qazaqpyn" degen sózdi maqtanyshpen, qaımyqpaı aıta alǵan ýaqyt bolǵanyn jetkizdi.
"Sizdiń osyndaı jarqyn bolashaqqa bastaǵan oılaryńyz Eýropa men Túrkıadaǵy qazaqtarǵa baǵyt berip, jol kórsetip, jón silteýshi boldy jáne ári qaraı da bola beredi.
Túrkıa men Eýropa qazaqtarynyń búgingi jáne keleshek urpaqtary úshin Qazaqtan jarqyn bolashaqtyń úmit kózi boldy. Atajurtymyzdyń kók baıraǵyn kók aspanda erkin jelbiretken, kúsh-qýaty myqty, ǵumyryńyzdyń uzaq bolýyn Alla taǵaladan tileımiz", - dep jazylǵan Túrkıadaǵy qandastar joldaǵan jedelhatta.
Munymen qatar, Túrkıa elindegi qazaqtar Qazaqstan Respýblıkasynyń qazirgi prezıdenti Qasym-Jomart Kemelulyn quttyqtap, jańa qyzmette tabys tiledi.
"Atalarymyzdyń kindik qany tamǵan jerdiń táýelsiz, álemge tanymal, qýatty jáne bedeldi memleket bolýy bizdi árqashan qýantady. Sondaı-aq, osyndaı dárejege jetken elimizdi shette júrgen biz árqashan maqtan tutamyz. Sizdiń tájirıbeli, bedeldi saıasatker jáne memleket qaıratkeri retinde Elbasy Nursultan Nazarbaev sıaqty halqynyń, eliniń qamyn oılaıtyn, memleketimizdiń ekonomıkalyq, saıası jáne áleýmettik turǵydan myqty el bolýy úshin eńbek etip, ónegeli ister atqarýǵa bar kúshińizdi salatynyńyzǵa shyn júrekten senemiz", - delingen jedelhatta.
Ári qaraı jyraqta júrgen qandastar elorda ataýyn ózgertý týraly sheshimniń Tuńǵysh Prezıdentke degen sheksiz qurmet ekenin aıtyp ótti. Budan ózge Qazaqstannyń ár salada damyp, alǵa jyljyp, jańa jetistikterge jetýi úshin árqashan óz úlesin qosýǵa daıyn ekenin jetkizdi.
"Búginge deıin atqarǵan qyzmetterińiz jáne elge sińirgen eńbekterińiz arqyly qazaq halqynyń súıispenshiligine bólengen sizge Alla taǵaladan ǵumyryńyzdyń uzaq bolýyn, denińizdiń saýlyǵyn, osy jaýapty qyzmette tabysty jáne abyroıly bolýyńyzdy tileımiz. Qazaq eliniń kók baıraǵy ashyq aspan astynda máńgilik jelbireı berýine tilektespiz", - deıdi Túrkıadaǵy qazaqtar.
Nursultan Nazarbaev 2019 jyldyń 19 naýryzynda prezıdent retinde ókilettigin toqtatty. Dese de, ol Qazaqstannyń Tuńǵysh prezıdenti – Elbasy (Ult kóshbasshysy) mártebesine, buǵan qosa eleýli ókilettigi bar Qaýipsizdik keńesin ómir boıy basqarý quqyǵyna ıe. Sonymen qatar, "Nur Otan" partıasynyń tóraǵasy, Konstıtýsıalyq keńestiń múshesi.
Usynǵan: Maqpal Sembaı
