Búgin áleýmettik jelide Túrkistan oblysy, Jetisaı qalasyndaǵy 28 jastaǵy áıel adamnyń kámelet jasqa tolmaǵan úsh qyzǵa zorlyq-zombylyq kórsetkeni týraly aqparat, beınefoto materıaldar tarap jatyr.

Atalǵan oqıǵa boıynsha quqyq qorǵaý organdarynyń qyzmetkerleri qylmystyq is qozǵap, tergeý amaldaryn júrgizýde.

Belgili bolǵandaı, úsh qyz bala da din aman, aýrýhanaǵa ýaqytynda jetkizilgen.

Túrkistan oblystyq polısıa departamenti jeli qoldanýshylaryna qatań eskertý jasady. Bul týraly departamenttiń baspasóz qyzmeti habarlady.

"Qurmetti áleýmettik jeli qoldanýshylary!

Jetisaı aýdanynda oryn alǵan kámelet jasqa tolmaǵan apaly-sińli úsh qyzdyń dene jaraqaty boıynsha vıdeo keń taraýda.

Osy oraıda Túrkistan oblysy polısıa departamenti kámelettik jasqa tolmaǵan balalardyń zorlyq-zombylyqqa ushyraý foto-vıdeosyn áleýmettik jeli men messendjerlerde jarıalaý QR Qylmystyq Kodeksiniń 147-babynyń 5-tarmaǵyna sáıkes jeti jylǵa deıin bas bostandyǵynan aıyrýǵa soqtyratyndyǵyn eskertedi.

Jarıalaǵan barlyq azamattarǵa óshirý jáne taratpaý kerektigin nazarlaryńyzǵa jetkizedi. Atalǵan oqıǵa boıynsha polısıa departamentimen tergep tekserý amaldary bastaldy jáne zańdy buza otyryp taratýshylardy anyqtaý jumystary júrgizilýde", - delingen arnaıy málimdemede.