Qyzylorda qalasynda polıseıge 2000 teńge syıaqy bergeni úshin avtokólik júrgizýshisine 200 AEK (eskertpe: 1 aılyq eseptik kórsetkish - 2525 teńge) kóleminde aıyppul salyndy.

Kentaý qalasynyń turǵyny E.K. esimdi azamat jol qaýipsizdigi erejelerin buzǵany úshin ákimshilik quqyq buzýshylyq hattamasyn toltyrtpaý maqsatynda Qyzylorda qalalyq jol polısıa qyzmetkerlerine 2000 teńge syıaqy bergen. Tártip saqshylary zańsyz syıaqy jóninde quzyrly organdarǵa habarlaǵan.

Óz kezeginde, memlekettik fýnksıalardy oryndaýǵa ýákilettik berilgen tulǵaǵa zańsyz materıaldyq syıaqy bergeni azamat E.K-ǵa QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Qyzylorda oblysy boıynsha departamentimen QR Ákimshilik quqyq buzýshylyq týraly kodeksiniń 676-babymen hattama rásimdelip, sotqa joldanǵan.

Departamenttiń bas mamany Murat Ysqaqov «E.K. esimdi azamat, aldyńǵy eki qaptaldaǵy terezeleri qarańǵylanǵan avtokólikti basqarǵany sebepti toqtatylyp, jol polısıa qyzmetkerlerine ákimshilik hattamany toltyrmaý úshin 2000 teńge zańsyz syıaqy bergen. Búgingi tańda, azamat E.K-ǵa sot qaýlysymen eki júz aılyq eseptik kórsetkish mólsherinde aıyppul salyndy. Mundaı ákimshilik is Qyzylorda oblysynda alǵash ret qaralyp otyr. Para nemese zańsyz syıaqy alýshymen qatar, ony berýshi de qatań jaýapkershilikke tartylady. Bul baǵyttaǵy profılaktıkalyq jumystar qarqyndy júrgizilýde, aldaǵy ýaqytta da jalǵasyn tabady», - dedi.

QR Ákimshilik quqyq buzýshylyq týraly kodeksine sáıkes, memlekettik fýnksıalardy oryndaýǵa ýákilettik berilgen tulǵanyń nemese oǵan teńestirilgen tulǵanyń 2 AEK (5050 teńge) deıingi kólemde zańsyz materıaldyq syıaqy, syılyqtar, jeńildikter ne qyzmetter alýy - 600 AEK (1515000 teńge) deıingi mólsherde, al, olarǵa 2 AEK deıingi kólemde zańsyz materıaldyq syıaqy, syılyqtar, jeńildikter berý ne qyzmetter kórsetý - jeke tulǵalarǵa 200 AEK (505000 teńge), zańdy tulǵalarǵa 750 AEK (1893750 teńge) mólsherinde aıyppul salý kózdelgen.

Eger, syıaqy kólemi 2 AEK artyq bolatyn bolsa, onda ol para retinde baǵalanady jáne ol úshin qylmystyq jaýaptylyqqa tartylady.