Qazaqstan Respýblıkasynyń ekinshi prezıdenti Qasym-Jomart Toqaev Tvıtter, Instagram sekildi iri áleýmettik jelilerde tirkelgen. Memleket basshysynyń akkaýntyna uqsas akkaýnt ashyp, sol arqyly jarnamadan tabys taýyp júrgen "jumyrtqadan jún qyrqatyn" alaıaqtar da bar eken.

Bul týraly QR Prezıdentiniń baspasóz hatshysy Berik Ýálı óziniń Feısbýk paraqshasynda jarıalady.

"Sońǵy kezderi ártúrli áleýmettik jelilerde Memleket basshynyń atynan ashylǵan feık akkaýnttar kóbeıip ketti. Sol arqyly jalǵan aqparat taratyp jatqandar da bar, keıbiri ony komersıalyq maqsatta qoldanyp jatyr.

Osyǵan baılanysty barsha áleýmettik medıa qoldanýshylar men BAQ ókilderine eskerterimiz - Qazaqstan Prezıdenti Qasym-Jomart Toqaevtyń atyna resmı tirkelgen eki akkaýnt qana bar. Olar: Twitter jelisinde 2011 jyldan beri jumys istep kele jatqan - @TokayevKZ, sondaı-aq, 2019 jyldyń sáýir aıynda Instagram jelisinde ashylǵan @tokayev_online akkaýnty.

Barsha áleýmettik jeli qoldanýshylardy Memleket basshysy týraly naqty rastalǵan aqparat alý úshin joǵaryda kórsetilgen resmı akkaýnttarǵa ǵana júginýge shaqyramyz", - dedi ol óz jazbasynda.

Ózge azamattyń atynan paraqsha ashyp, ony jeke múddege paıdalanýdy zań quptamaıtyny anyq. Qoldanýshylar memleket basshysynyń baspasóz hatshysyna paıdaly aqparat jetkizgeni úshin alǵys bildirýde.