Mańǵystaýda «Bıznes 3 kúnde» jobasy erekshe qarqyn aldy.  1 aıdyń ishinde 100-den astam kópbalaly ana men az qamtylǵan otbasylar úı jaǵdaıynda óz isin bastady. Basym bóligi Jańaózen qalasynyń turǵyndary.

Búgin Jańaózen qalasynda jeke kásibin ashqan kásipker-analardyń jármeńkesi ótti. Turǵyndar kásipkerlerdiń qysqa merzim ishinde jetken jetistikterine kóz jetkizip, olardyń óndirgen taýarlaryn satyp aldy. Analardyń qýanyshyn bólisýge oblys ákimi Eraly Toǵjanov ta baryp, kórmeni aralady. Aımaq basshysy da kásipker-analardyń ónimin satyp aldy.  

Az ǵana ýaqytta Jańaózende «AliTort»,«Xanbibi», «Ozen nan», «Raıymbek», «Aıan», «Teńge samsasy», «Álınur», «Araı» sekildi 100-den asa jańa brendter paıda boldy. Áleýmettik jaǵdaıy tómen otbasylar men kópbalaly analarǵa úı jaǵdaıynda óz bıznesin ashýǵa, ony saýatty júrgizýge qarjy – jeke kásipkerler men mesanattardyń qoldaýymen júzege asyp jatyr.

Osylaısha, óńirdiń áleýmettik az qamtylǵan jáne kópbalaly otbasylary jappaı jeke kásibin ashýda. Solardyń biri – Kóbenova Gúljamal kóp balaly ana. Nebári 2 kún ishinde «Aıdaı» brendimen nan ónimderin shyǵara bastady. Kúndelikti taýaryn sýpermarketterge jóneltip, jeke tapsyrystardy oryndaıdy. Sóıtip, kúnine 20-25 myń teńge tabys taýyp otyr. Joba naýryzdyń 14-de bastaý alǵan.

«Men Qyzylsaı aýylynyń turǵyny Kobenova Gúljamal oblys ákimi Eraly Toǵjanovtyń bastamasymen jáne jergilikti kásipkerlerdiń qoldaýymen bastaý alǵan «Bıznes 3 kúnde!»  jobasyna ótinish bildirip, «Aıdaı» nan ónimderi ataýymen óz kásibimdi bastap kettim. Bastapqyda joba úılestirýshileri úıge kelip túsindirgen kezde, bul qandaı joba? Nege nesıesiz, kepilsiz, degende ótirik dep oıladym. Shyn mánisinde bir aptadan keıin maǵan habarlasyp, kerekti qural-jabdyqtarymdy ákelip berdi. Men qatty qýandym.

Qazirgi tańda ózimniń kásibimdi bastadym úlken rahmet! Sonymen qatar osy joba úılestirýshilerine jáne qoldaý bildirýshilerge úlken alǵysymdy aıtamyn. Osyndaı áleýmettik jobalar kóp bolsyn, abyroılaryńyz arta bersin!»-degen joba qatysýshysy qýanyshyn jasyrmady.

Al, Boranova Áıgerim «Asylym» brendimen qolóner buıymdaryn sattyqqa shyǵara bastady.

«Osy ýaqytqa deıin, tek Jańaózen qalasy boıynsha arnaıy top 307 úıdi aralap, 100-ge jýyq otbasynyń kásippen aınalysýyna múmkindik syılady. Ár otbasyda ortasha eseppen 6-8 adam dep alǵanda, shamamen 600-ge jýyq adamnyń áleýmettik jaǵdaıy jaqsardy degen sóz. Bul jobanyń barlyq áleýmettik jobalardan ereksheligi – halyqqa balyq emes, qarmaq berý», - deıdi joba jetekshisi Aıjanı Nurlanova.

Mańǵystaý oblysynyń ákimi Eraly Toǵjanov «Bıznes 3 kúnde» kásipkerlik jobasynyń aıasynda óńirde 370 jańa kásip ashýdy tapsyrǵan bolatyn. Bul joba óńirdiń barlyq aýdan-qalalarynda qarqyndy júzege asyp jatyr. Jyl aıaǵyna deıin 1000 otbasynyń kásip ashýyna múmkindik jasaý josparlanýda. «Bıznes 3 kúnde» kásipkerlik-jobasynda jelilik marketıń tásilderi paıdalanylady. Úı jaǵdaıynda bıznes ashyp, kásibin turaqtandyrǵan azamat, taǵy 5 azamatqa kásip ashýyna kómektesse ár adam úshin, syıaqy beriledi.

Budan bólek, «Bıznes 3 kúnde» jobasynyń aıasynda «Jaqsylyq jasa!» atty Jańaózen qalasy turǵyndarynyń arasynda marafon uıymdastyryldy.

Jalpy Jańaózende jumyspen qamtý keshendi túrde júzege asýda. Qala, aýyl turǵyndarynyń arasynda jumyssyzdyq máselesin sheshý maqsatynda jyl basynan beri barlyǵy 2159  adam áleýmettik sharalarmen qamtyldy. Onyń 350-i «Ózenınvest» JSHS ornalasqan. 104 adam óndiristik salaǵa, 40 kólik, 61 shaǵyn jáne orta bızneske, 382 adam búdjettik salaǵa, 105 áleýmettik jumys, 55 komýnaldyq jáne 1020 azamat qoǵamdyq jumyspen qamtyldy. 130 azamat Aqtaý qalsyna qonys aýdarýǵa nıet bildirip, jumyspen qamtylýda.