QR Premer-Mınıstri Asqar Mamınniń tóraǵalyǵymen ótken Úkimet otyrysynda Elbasynyń Bes áleýmettik bastamasyn iske asyrý aıasynda stýdent jastardy jataqhanalarmen qamtamasyz etý máselesi qaraldy. Úkimet basshysy Asqar Mamın stýdentterdiń jataqhana máselesin sheshýge naqty tapsyrmalar berdi dep habarlaıdy Qamshy.kz aqparat agenttigi QR Premer-Mınıstriniń resmı saıtyna silteme jasaı otyryp.

Bilim jáne ǵylym mınıstri Kúlásh Shámshıdınova jataqhana qurylysy boıynsha jospardy oryndaý úshin Úkimetke birqatar shara usynǵan bolatyn.  Stýdentterdiń sapaly bilim alýy úshin eń aldymen stýdentterdiń jaǵdaıy jasalyp, turatyn oryndary daıyn bolýy kerek. Osy olqylyqtardyń ornyn toltyrý úshin qajetti qarjy bólý modeli ázirlengen. Mınıstrlik naqty is-sharalar josparyn da daıyndaǵan.

«Joǵary deńgeıdegi bilim berý júıesin qurý úshin stýdentterdiń turý jaǵdaıyn jasaý kerek», — dedi Asqar Mamın.

Ázirge memlekettik oqý oryndaryna ınvestorlar kóp qyzyǵýshylyq tanytyp otyrǵan joq. Sondaı-aq, Asqar Mamın jataqhana qurylysy úshin memlekettik búdjetten qosymsha qarajat bólinbeıtinin eskertti.

«Ákimder rektorlarmen jáne oqý oryndarynyń basshylarymen birlesip, stýdentter jataqhanalaryn salý jumysyn jandandyryp, josparlanǵan nysandardy ýaqytynda tapsyrýdy qamtamasyz etsin, qymbat jobalyq-smetalyq qujattama ázirleýdi toqtatsyn», — dep tapsyrdy QR Premer-Mınıstri A. Mamın.