«Progres» polıtehnıkalyq kolejiniń bilim alýshylary «Almaty qolóner palatasy» qoǵamdyq qorynyń qoldaýymen qalalyq qolóner jármeńkesine qatysty. Jármeńkede múmkindigi shekteýli kolej tálim alýshylary óz buıymdaryn usyndy: qoldan jasalǵan sabyn jáne tigin ónimderi (balalardyń ulttyq kıimderi, tósek-oryn jabdyqtary, súlgiler jáne t.b.).

Nýhra Seıtjapbarova, qoldan sabyn jasaý boıynsha tálim alýshy: «Men 3 toptaǵy múgedekpin, estý jáne sóıleý múmkindiginen aıyrylǵanmyn, biraq kolejde bilim alý arqasynda men janyma jaqyn mamandyqty ıgerdim. Men qoldan sabyn jasaımyn jáne men úshin bul tek qolóner ǵana emes, sondaı-aq bul - shyǵarmashylyq. «Progres» kolejiniń  bilim alýshysy Asqat Aqkýnashevpen tandemde jumys isteı otyryp, biz pishini, túsi jáne faktýrasy boıynsha biregeı buıymdar jasap shyǵaramyz. Osylaı  eńbek etip, bir-birimizdi túsinip, qoldaýdy úırendik, nátıjesinde otbasyn quryp, osy jármeńkede búgin usynylyp otyrǵan birlesken shyǵarmashylyqty jalǵastyrýdamyz».

Shyryn Maralbekova, tigin buıymdaryn tigý boıynsha tálim alýshy: «Men nashar estımin, biraq bul tiginshilikti úırenýge kedergi keltirmedi, men qoǵamǵa paıda ákeletinime  jáne otbasynyń jalpy tabysyna úles qosa alatynyma óte qýanyshtymyn. Ár túrli is-sharalarǵa belsendi qatysýǵa tyrysamyn, árıne, óz buıymdarymdy ártúrli jármeńkelerde kórgim keledi, sebebi meniń jumystarym aınaladaǵylar úshin qyzyqty ekenin baıqaımyn jáne buıymdarymdy satyp alǵan kezde qýanamyn».

Mıgerova Elena, tigin buıymdaryn tigý boıynsha tálim alýshy: «Keleńsiz jaǵdaıǵa tap bolyp, saldarynan 30 jasymda aıaǵymdy kesýge májbúrlik týyndady, men múgedek atandym. Buryn men saýda jumys istegenmin, qazir mundaı kásip men úshin emes. «Progres» koleji arqyly úıde otyryp jumys isteı alatyn mamandyq boıynsha bilim alý múmkindigi paıda boldy. Qazir men kýrsty sátti aıaqtaýdamyn jáne alǵashqy tapsyrystar da bar. Múgedekter problemalaryna nemquraıly qaramaıtyn jáne kómek kórsetetin barlyq adamdarǵa úlken rahmet aıtqym keledi, oqytýshylarǵa da alǵysymyzdy bildiremiz».

«Progres» koleji Almaty oblysynyń İle aýdanyndaǵy Ótegen batyr aýylynda jumys isteıdi jáne stýdentterdi ártúrli mamandyqtarǵa oqytady, sonymen qatar kolej 18 jastan asqan eresek adamdarǵa, sonyń ishinde erekshe qajettilikteri bar adamdarǵa suranysqa ıe kásipter boıynsha mamandyq alýǵa múmkindik beredi.

«Progres» kolejiniń dırektory Janna Telpekbaevanyń aıtýynsha, erekshe qajettiligi bar jandardy oqytýdyń mańyzdy ereksheligi bar - muǵalim mundaı stýdentterge eki ese súıispenshilikpen qaraýy kerek jáne shynaıy bolýy shart. Sondaı-aq, kolej óz túlekterine bolashaqta jumysqa ornalasýǵa nemese óz isin uıymdastyrýǵa kómektesýdi mańyzdy sanaıdy.

Janna Telpekbaeva, «Progres» kolejiniń dırektory: «Aldymen biz olardy úlken kásiporyndarǵa, tigin fabrıkalaryna ornalastyrdyq, biraq jumys qarqyny, jospary, barlyq jaǵdaı olarǵa teris áser etti, tıisinshe olar alańdady, ýaıymdady jáne eshteńe shyqpaǵan soń, olar ózderi jumystan óz erkimen kete bastady. Sol shaqta biz aýylymyzdaǵy, Almatydaǵy kıim-keshek jóndeýdiń sheberhanalary bar saýda ortalyqtaryn aralyp kórdik, olar sonda jumysqa ornalasyp jatty. Óz isin ashqysy keletinderge biz úıde óz bıznesin damytýǵa kómektesemiz. Ár adamǵa jeke qaraý oryndy, álsiz emes, adamnyń basym qasıetterine zer salyp, olardy damytý kerek. Biz «Fılıp Morrıs Qazaqstan» kompanıasyna óte rızamyz, olarmen birge biz kóptegen jyldar boıy erekshe qajettilikteri bar adamdarǵa óz ómirlerin jaqsartýǵa kómektesetin jáne olardyń ósýi men damýy úshin jańa múmkindikter syılaıtyn osy jobany tabysty júzege asyrýdamyz».