Polısıa ókilderi 13 jastaǵy "Balapan" telearnasynyń júrgizýshisiniń ólimine qatysty tergeý jumystaryn júrgizip jatyr, - dep habarlaıdy Qamshy.kz aqparat agenttigi Nur-Sultan qalalyq polısıa departamentiniń baspasóz qyzmetine silteme jasap.

Quzyrly organ málimeti boıynsha, 13 jastaǵy Qutjan Baǵlan jol jıeginde velosıpedpen kele jatyp jol apatyna ushyraǵan. Alǵan jaraqattarynan jasóspirim aýrýhanada qaıtys boldy.

"10-mamyrda saǵat 17.30 shamasynda Qosshy aýylyna alyp baratyn tas jol boıynda júk kóligi men velosıped soqtyǵysyp qaldy. Kámeletke tolmaǵan velosıpedtegi jasóspirim dene jaraqatyn alyp, aýrýhanaǵa túsken. 16-mamyrda ol qaıtys boldy. QR QK 345-baby "Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy" boıynsha sotqa deıingi tergeý júrip jatyr. Tıisti saraptamalar taǵaıyndaldy", - dedi Nur-Sultan qalalyq polısıa departamentiniń ókili.

Eske sala keteıik,  birneshe kún buryn áleýmettik jelilerde Qutjan Baǵlannyń qatysýymen bolǵan jol kólik oqıǵasy týraly aqparat paıda boldy. "Balapan" telearnasynyń dırektory Maqpal Jumabaı Instagram jelisindegi akkaýntynda 13 jastaǵy júrgizýshiniń mert bolǵanyn jazǵan.

Usynǵan: Ádilet Mádenıet