«Astana ekonomıkalyq forýmy» aıasynda Mańǵystaý oblysy «Astana halyqaralyq qarjy ortalyǵymen» birigip, «Global Silk Road Mangystau invest 2019» halyqaralyq forýmyn ótkizdi. Nátıjesinde Mańǵystaý oblysy alǵash bolyp ózge oblystardyń ishinen «Astana halyqaralyq qarjy ortalyǵymen» memorandýmǵa qol qoıdy. 
Osylaısha oblys ákimi Eraly Toǵjanov pen AHQO basqarýshysy Qaırat Kelimbetov jańa memorandým aıasynda jan-jaqty kelisimge keldi. Budan bylaı Mańǵystaý óńiri ınvestorlarmen halyqaralyq quqyq qaǵıdattary boıynsha jumys isteıtin bolady. 
Basty maqsat AHQO qatysýshylaryn Mańǵystaý oblysynyń ekonomıkasyna ınvestısıa quıýǵa shaqyrý arqyly aımaqtyń ekonomıkalyq áleýetin arttyrý. Búgingi forýmnyń nátıjesinde kásipkerlermen Mańǵystaý oblysynda quny 230 mln AQSH dollaryn quraıtyn eki ınvestısıalyq jobany iske asyrý boıynsha kelisimge keldi.
Óńirlerge ınvestısıa tartýdyń jańa modeli retinde bıyl «Astana ekonomıkalyq forýmynyń» aıasynda «óńir qonaq» jańa júıesi engizilip, oǵan alǵash bolyp Mańǵystaý oblysy tańdaldy. Bul júıeniń basty maqsaty óńirge álemdik deńgeıdegi jańa ınvestorlar men qarjy uıymdaryn jumyldyrý.
«Astana» Halyqaralyq qarjy ortalyǵynda ótken forýmda oblys ákimi Mańǵystaý óńiriniń ınvestısıalyq áleýetimen tanystyrdy.
Atap aıtqanda, aımaqqa Túrkıa, Reseı, Qytaı, Italıa, AQSH, Germanıa jáne basqa elderden kelgen iri sheteldik ınvestorlar keldi.
Forbes Global 2000 tiziminde turǵan CNPC, Shlumberger, Halliburton, OMV Petrom, Total, Saipem, Tenaris, Arcelor Mittal, Heidelberg Cement sekildi kompanıalardyń qatysýymen túrli salalarda birneshe jobalar oıdaǵydaı iske asyryldy.
Búgingi tańda Mańǵystaý oblysynyń 2019-2025 jyldarǵa baǵyttalǵan, 2,4 trln. teńge quraıtyn 44 ınvestısıalyq jobasy belgilendi.
Olardyń ishinde, shet memleketterdiń qatysýymen 2,2 trıllıon tenge quraıtyn 18 jobany iske asyrý josparlanǵan.
2019 jyly oblysta 66,7 mlrd. teńgeni quraıtyn 22 jobany, onyń ishinde, quny 38,4 mlrd. teńgeni quraıtyn 4 jobany sheteldikterdiń qatysýmen iske qosý josparlanyp otyr.
Qazaqstan Respýblıkasy Tuńǵysh Prezıdentiniń tapsyrmasyna sáıkes, Mańǵystaý oblysynyń ákimdigi «SOP«Mangıstaý» JSHS bazasynda ınvestorlarǵa bir tereze qaǵıdaty boıynsha qyzmet kórsetýge arnalǵan «Front ofıs» jumys isteıdi.
«Front ofıstiń basty maqsaty ınvestorlardy barlyq úkimettik jáne basqa uıymdarmen baılanysty jumystaryn arttyrý.Munda áleýetti ınvestor Mańǵystaý oblysyndaǵy ınvestısıalyq qyzmetti memlekettik qoldaýdyń yqtımal nysandary týraly jáne ózderińe qajetti barlyq aqparattardy alady. Búgingi kúni oblys ákimdiǵi ınvestısıalyq saıasatty júzege asyrý maqsatynda, memlekettik organdar men basqa da uıymdar arasyndaǵy ózara árekettesý erejelerin daıyndap berdi. Erejede front ofısiniń búkil jumysy qarastyrylǵan», - dedi E.Toǵjanov.
Sonymen qatar, aldaǵy 5 jylda oblysty damytýdyń basym baǵyttary - týrızm, aýyl sharýashylyǵy, ónerkásip, energetıka, kólik jáne logıstıka salalarynda 6 ınvestısıalyq qurylym bar. Ár salanyń ınvestısıalyq tartymdylyǵy orys, aǵylshyn, túrik, parsy, qytaı tilderine aýdarylyp jazba túrde usynylady.
Budan basqa, sheteldik ınvestorlardyń qatysýymen, kóp fýnksıonaldy logıstıkalyq ortalyqtyń, tuzsyzdandyrý zaýytynyń, kaýstıkalyq soda men tuz qyshqylyn shyǵaratyn zaýyttyń, sý tushytý qondyrǵysynyń qurylysy sıaqty perspektıvalyq jobalar júzege asyrylýda.
Yńǵaıly geografıalyq ornalasýy, baı tarıhı muralary men kórnekteri, teńizge shyǵýdyń qol jetimdiligi, sondaı-aq negizgi týrısik aǵyndardy týdyratyn elderge jaqyn bolý týrızmdi damytýǵa múmkindik beredi.
Mańǵystaýda týrızmdi damytý úshin, 63 shaqyrymǵa sozylǵan teniz jaǵalaýynda ınjenerlik ınfraqurylymdy jasaý jumystaryn bastap ketti.
«Óńirdin klımattyq jaǵdaıy aımaqqa elektr qýatynyń qosymsha kózi úshin, kún jáne jel elektr stansıalaryn salýǵa múmkindik beredi. Aımaqtaǵy shýaqty kúnderiniń uzaqtyǵy jylyna 300 kún bolyp tabylady. Bul eldegi eń jaqsy kórsetkish, jeldiń jyldamdyǵy - 8,43 metr sekýnd. Sondyqtan basqa mańyzdy sektor - balamaly energıa kózderin damytý. Bul keleshekte elektr energıasyn óndirýdiń barlyq dástúrli ádisterin toqtata alatyn eń perspektıvaly resýrstardyń biri. Búgingi tańda aımaqta qýaty 90 MVt jel elektr stansıasy salynyp jatyr », - dedi oblys ákimi.
Sóziniń sońynda Eraly Toǵjanov ınvestorlarǵa, Mańǵystaý oblysy bıznesti qoldaıtynyn jáne «ashyq esikter» prınsıpimen jumys isteıtinin, sondaı-aq jergilikti atqarýshy organdar ózara tıimdi yntymaqtastyqqa daıyn ekendikterin jetkizdi.
