Aǵymdaǵy jyly Jambyl oblysynda memlekettik «Nurly jer» baǵdarlamasy boıynsha 465,4 myń sharshy metr turǵyn úıdiń qurylysyn júrgizý josparlanǵan. Onyń ishinde 140 247  sharshy metr kóppáterli, 325 153 sharshy metr jeke turǵyn úı qurylysyna jatady. Sonymen qatar, óńirde «Nurly jer» baǵdarlamasy aıasynda turǵyn úıler jáne ınjenerlik ınfraqurylymmen qamtamasyz etý nysandaryna 16,7 mıllıon teńge qarjy qarastyrylǵan. Al onyń ishinde arendalyq úılerge 5,7 mıllıard, kredıttik úılerge 6,2 mıllıard, al jalpy ınfraqurylymdy damytýǵa 4,6 mıllıard teńge bólingen.

Jambyl oblysy boıynsha bólingen qarjy esebinen 30 kóppáterli turǵyn úıdiń qurylysy júrgizilip, 14 ınjenerlik ınfraqurylym jobalary iske asyrylady. Jambyl oblysy ákimdigi qurylys basqarmasynyń basshysy Jaıyqbaı Shaldarovtyń aıtýynsha, aǵymdaǵy jyly búdjet esebinen 2095 adam pátermen qamtamasyz etiledi. Iaǵnı, satyp alý múmkindiginsiz jalǵa beriletin turǵyn úı salý boıynsha bıylǵy jyly 658 páterli arendalyq 9 úıdiń qurylysy jáne qaıta jańǵyrtý jumystary júrgiziletin bolady. Máselen, Taraz qalasynda 400 páterli 5 úı, Qordaı aýdanynda 50 páterli 1 úı, Jambyl aýdanynda 18 páterli 1 úıdiń qurylysy júrgizilgen bolsa, Sarysý aýdanynda 190 páterli 2 úıge qaıta jańǵyrtý jumystary júrgiziletin bolady. Sonymen qatar, 2019 jyly 1460 páterli 21 úıdiń qurylysyn aıaqtap, paıdalanýǵa berý josparlanyp otyr eken.

Turǵyndarǵa kredıttik negizde úlestiriletin turǵyn úılerden 800 páterli 10 úı ótken jyldan ótpeli bolsa, 660 páterli 11 úıdiń qurylysy jýyq arada bastalatyn bolady. Taraz qalasynda júrgiziletin mundaı turǵyn úılerdiń qurylysyna 6,2 mıllıard teńge bólingen.

Taǵy bir aıta ketetin másele, aımaqta biryńǵaı sáýlettik stılde jeke úıler salý jobasy boıynsha Taraz qalasynda 255 úıdiń qurylysy bastalyp ketti. Bul turǵyn úılerdiń bári de aǵymdaǵy jyly óz ıelerine tabystalatyn bolady dep kútilýde.

Dýlat Aıtbaı