Jambyl oblysynyń batysynda oryn tepken Sarysý aýdany búgini berekeli, bolashaǵy baıandy. Aımaqta Elbasy Joldaýlarynyń negizinde ómirge kelgen mmelekettik baǵdarlamalar sátti júzege asyp, jańa jumystary ashylýda. Óńirdegi irgeli óndiris orny «Qarataý» taý-ken óńdeý kesheni jumys aýqymyn arttyra tússe, reseılik «Evrohım» kompanıasy da ilkimdi isterimen ilgeri umtylýda. Sonymen qatar bıyl jel elektr stansasynyń qurylysy da qarqyndy júrgizilip jatyr. Odan bólek monoqalalardy damytýdyń memlekettik baǵdarlamasy sheńberinde Jańatas qalasy da kórkeıe túsýde. Endi mine, Sarysýdyń sodsy da brendke aınalatyn kún jaqyn.
Mundaı jaǵymdy jańalyq jýyrda Jambyl oblysynyń ákimi Asqar Myrzahmetovtiń «Yildirim Holding» túrik kompanıasynyń ókilderin qabyldaýy barysynda aıtyldy. Eki jaqty kezdesýge oblys ákiminiń tıisti orynbasarlary men salalyq basqarma jáne «KazakhInvest» UK AQ-nyń oblys boıynsha fılıalynyń basshylary qatysty.
Buǵan deıin belgili bolǵandaı túrkıalyq kompanıa óńirimizde «Kalsılendirilgen soda óndirisi» ınvestısıalyq jobasyn júzege asyrmaq. Sarysý aýdanynan irge qalaıtyn jobanyń jalpy quny 270 mıllıon AQSH dollaryn quraıdy. Zaýyttyń jyldyq qýaty 400 myń tonna ónim óndirýge qýatty. Jobany 2019-2022 jyldar aralyǵynda iske asyrý kózdelýde.
Kezdesý barysynda «Yildirim Holding Soda Ash&Derivatives» komanıasynyń bas dırektory Ismaıl Djeılan oblys basshysynan birqatar máselelerdi sheship berýin surady. Ásirese jer, sý máselelerin aldyǵa tartty. Sondaı-aq, ol joba iske asqanda ónimmen ishki jáne syrtqy naryqty qamtamasyz etip, Sarysý sodasyn brendke aınaldyrýǵa bolatynyna nazar aýdartty.
Óz kezeginde oblys ákimdiginiń jer qoınaýyn paıdalanýdy basqarý basqarmasynyń basshysy Baqtıar Kópbosynov jer máselesi sheshiletinin, ol boıynsha jumystar júrgizilip jatqanyn jetkizdi. Al, sý máselesin sheshý boıynsha tıisti sharalardy júıeli túrde atqarý úshin óńir basshysy jaýapty tulǵalarǵa naqty tapsyrmalar júktedi.
Asqar Isabekuly ınvestorlarǵa oblys tarapynan tıisti qoldaýlar jasalatynyn basa aıtyp, bul baǵytta taraptardyń qol qoıǵan memorandýmy aıasynda ortaq jumys josparyn bekitý kerektigin usyndy. Bekitiletin jumys jospary arqyly naqty sharalar atqarylmaq. Óńir basshysy ken óndirý barysynda ekologıalyq qaýipsizdik sharalarynyń saqtalýyna da asa kóńil bólý kerektigine kóńil bóldi.
Aıta keteıik, «Yildirim Holding» - tórt qurlyqta jumys isteıtin iri holdıń. Qazirgi kezde holdıń Qazaqstanda bıznes júrgizýde aıtarlyqtaı tájirıbesi bar kompanıa bolyp eseptelinedi.
Búgingi tańda Sorkól keninde barlaý jumystary bastalyp ketti. Sondaı-aq, jobalyq-smetalyq qujattama men tehnıkalyq-ekonomıkalyq negizdeme jumystary ázirlenýde.
Baqyt Jalǵas
