Jaqynda Tatarstandyq «ProKazan» aqparattyq saıtynda «Qazaqstandyq dıplomattar «avtohamdar» atty maqala jaryq kórdi. Onda Qazaqstan konsýldyǵynyń qyzmetkerleri, jol erejelerin jıi buzatyndyǵy jáne avtobýs aıaldamalaryna kólikterin qoıyp ketetindigi týraly aıtylǵan. Bul týraly «Qamshy» portaly habarlaıdy. Árıne, bul óz kezeginde qoǵamdyq kólikterdiń qozǵalysyna kedergi keltiretini túsinikti. Atalmysh bassyzdyqqa baılanysty jergilikti turǵyndardyń shaǵymynan soń, saıt redaksıasy Qazandaǵy Qazaqstan elshligine habarlasyp, mán jaıdy bilmek bolyp, birneshe dálel keltirgen. Al elshiliktegiler bolsa, kóliktiń qazaqstan elshiliginiń satý jónindegi keńesshisine tıesi ekendigin, ázirge jeke avto turaq joq bolǵandyqtan, bir jyl kóleminde atalmysh kóshe boıyna kólik qoıyp júrgendikterin jáne bul óreskel jol erejesin buzyshylyqqa jatpaıtynyn jetkizgen. Sondaı-aq, Qazaqstan elshiligine tıesili, sheteldik nómirli taǵy bir kólik Qazan qalasyndaǵy Ýnıversıtetskaıa kóshesinde de tirkelgen. Ázirge jergilikti polısıa qyzmetkerleri qazaqstandyq dıplomattardyń kólikterine tekserý, olarǵa aıyppul sala almaıtyndyqtan, dıplomattar jol erejesine múlde baǵynbaıtyndyqtaryn aıtqan. Al RF SİM men Bas prokýratýrasy 2014 jyly jol erejesin jıi buzatyn sheteldik dıplomattardy mansabynan aıyrý týraly usynys jasaǵan bolatyn. Barlyǵy olardyń elshilik qyzmetkerlerine beriletin qujattaryna baılanysty. «Meıli, kólik jol erejesin buzsa da, eger ol azamatta elshilik qujaty bolsa, biz eshqandaı aıyppul sala almaımyz. Halyqaralyq konvensıada osylaı bekitilgen. Buǵan erkinsinip alǵandar bolsa, jol erejesine baǵynbaı, emin-erkin júredi. Bular «avtoham» emeı nemene» -deıdi Qazan qalalyq JPQ komandıri orynbasary Mıhaıl Savın. Olar sheteldi bylaı qoıyp, Qazaqstannyń ishinde de jol polısıa qyzmetkerlerine pysqyryp ta qaramaıdy eken. Qyzmettik kóliktermen júretin qazaqstandyq sheneýnikter jol erejesin jıi buzady. Onyń ústine aıyppul da tólemeıtin kórinedi. Mysaly, byltyrǵy jyly memlekettik mekemelerdiń tóleýge mindetti, alaıda tólenbegen aıyppuldyń 1238 faktisin anyqtalǵan. QR Bas prokýratýrasynyń málimetterine súıensek, Astana, Almaty, OQO men Qyzylorda oblysynda ótelmegen aıyppuldyń jalpy somasy 11,5 mln. teńgege jetken. Bul kólikter memlekettik organdardyń atyna tirkelgendikten, aıyppul qaǵazdary da sol jaqqa jiberilgen. Alaıda bul da nátıjesiz bolǵan. Al jol erejelerine baǵynbaı, qoǵamdyq tártipti buzǵan sheteldik sheneýnikterdiń qaryzy 1,5 mlrd. teńgege jetken. Al shekpenindegi shenderine masattanyp júrgenderdiń balalary she? Dálirek aıtsaq, jol erejelerin jıi buzatyn sheneýnikterdiń ózderi emes, balalary bolyp shyǵady. Mysaly, Maqsat Úsenovty almatylyqtar kópke deıin umyta qoımas. Únemi jol erejesin saqtamaıtyn, tek ákimshilik jaýapkershilikpen ǵana qutylyp ketetin Úsenovtiń kólikteri de árkimniń qaltasy kótere bermeıtin, qymbat markadan bolyp shyqqan.
- BMW X6. Tap osy kólikpen Úsenov aıaldamada turǵan alty adamdy qaǵyp ketken bolatyn. Amalyn taýyp jazadan qutylyp ketken ol arada kóp ýaqyt uzamaı taǵy bir qandy oqıǵanyń ortasynan tabylǵan.
- Porshe 911. Úsenovtiń Porshe 911 kóliginde Almaty kóshelerinde júrgenin Facebok qoldanýshylary óz paraqshalarynda jazdy. Maqsatty tanıtyn adamdar da onyń kólik turaǵynan osy kólikti baıqaǵanyn aıtqan.
- Toyota Avensis. Jol apatynan soń Maqsat Úsenov “Toıotoǵa” otyrdy. Alǵashynda bul kólikti Maqsat ózi júrgizbeı, arnaıy kólik júrgizýshisine tapsyrǵan. Alaıda, jolaýshy bolýdan jalyqqan ol rólge qaıta otyrdy.
- Mercedes-Benz SL. Keıin Úsenovtiń balasy Maqsat mersedesti tizgindedi. Taǵy da jol apaty oryn alǵan.
- Mercedes-Benz S-Class W221. Úsenov osy kólikpen sońǵy ret jol erejesin buzǵan bolatyn.
