Baıaǵyda bir ataqty samýraı bolypty. Birde ol quly ekeýi jolǵa shyǵady. Jazdyń aptap ystyǵynda kenezesi keýip kele jatqan samýraıdyń kózi qaýyn baqshasyna túsedi. Saıdyń tasyndaı teńkıgen qaýyndardyń pisip turǵan shaǵy eken. Samýraı oılanbastan bireýin qylyshymen jaryp jiberip shólin qandyrady. Qaýyndy jep bolǵanda bul áreketiniń urlyq ekenin sezedi. Samýraı quly ekeýi ary qaraı júre beredi. «Ekeýmiz bireýdiń baqshasynan qaýyn urlap jegenimizdi eshkimge aıtpa» deıdi Samýraı qulyna. Qul «tis jarmaımyn» dep ýáde beredi. Kún uıasyna batyp, tún bolǵanda ekeýi bir taýǵa jetedi. Taýda túnemek bolady. Samýraı «Quldyń aýzynda sóz turmas. Erteń-aq meniń ıem urlyq jasady dep elge jaıyp jiberer. Odan da bunyń kózin qurtaıyn» dep oılaıdy da, uıyqtap jatqan quldyń basyn shaýyp tastaıdy. Ataqty Samýraıdyń quly jolda óldi degen habar búkil elge jaıylady. Quldyń sheshesi eńiregende etegi jasqa tolyp, balasynyń basy shabylǵan jerge keledi. Ananyń zarlaǵandaǵy daýsy búkil eldiń saı-súıegin syrqyratypty deıdi. Balasynyń basyn qushaqtaǵan áıel ózenniń jaǵasyna kelip, «Eger óz kináńnan ólseń, sýǵa bat, kinásiz bolsań sý betinde qalqyp aq» dep, basty ózenge tastapty. Bas sýǵa batpaı, birden  ózen aǵysyna qarsy joǵary qaraı qalqyp barady eken. Bul kóriniske kýá bolǵan  jurt qatty tańqalypty deıdi. Sol túni bas shabylǵan jerde ottyń ushqyny paıda bolyp, áýege kóterilipti. Samýraıdyń aýylynyń tóbesinde kúrkiregen ún shyǵarǵan ushqyn eldiń záresin alypty. Tylsym qubylys samýraıdyń úıiniń tóbesinde naızaǵaıdaı kúrkirep turyp alypty. Kúndiz kúlki, túnde uıqydan aıyrylǵan Samýraı kóp uzamaı jyndanyp ólipti deıdi.   Sharafat Jylqybaeva