Qazaqstan 140 etnos pen 19 konfesıa ókilderiniń týǵan shańyraǵyna aınaldy. Azamattyq  tatýlyq pen ultaralyq kelisim – bizdiń basty qundylyǵymyz. Taraz qalasynyń «Dostyq úıinde»   Jambyl oblysy Qazaqstan halqy Assambleıasynyń «Arhyz» respýblıkalyq qoǵamdyq birlestigi –   «Birlik» qarashaı-balkarlardyń Jambyl fılıaly» etnomádenı birlestiginiń etnos kúni ótti dep jazady Qamshy.kz aqparat agenttigi. 

Jambyl oblysy ákimi apparaty «Qoǵamdyq kelisim» komýnaldyq memlekettik mekemesi men «Arhyz» respýblıkalyq qoǵamdyq birlestiginiń janyndaǵy oblystyq «Birlik» qarashaı-balkarlar Jambyl fılıaly» etnomádenı birlestigi uıymdastyrǵan  basqosýda  Jambyl  oblysy ákimi apparaty  «Qoǵamdyq kelisim» KMM basshysy  Rano Mahsýdqyzy  jıylǵan qaýymdy ataýly kúnmen quttyqtady.

-  Qazaqstan – barlyq etnos ókilderine keń qushaǵyn jaıa bilgen qasıetti el. Óńirlik «Birlik» qarashaı-balqarlar etnomádenı birlestigin búgingi etnos kúnderimen quttyqtaı otyryp, ótkeni men bolashaǵyna zor qurmetpen qaraıtyndyǵymyzdy bildiremiz. Qarashaı-balqarlar qaýymdastyǵyna degen yqylasymyz sheksiz. Uıymnyń talapty, ónerli jastaryna ósip-órkendeý tileımiz,- dep jyly lebizin bildirdi.

İs-shara barysynda jastardy tárbıeleý  jáne úlkenge qurmet kórsetý, ata-babalar rýhyna taǵzym etý,  basqa da etnıkalyq erekshelikterge qatysty dástúrlerdi saqtaý máseleleri haqynda kóp oılar aıtyldy.

  – Qanshama qaıǵy-qasiret pen qýǵyn-súrgindi basynan ótkergen qarashaılardyń janyna batqan qıyndyǵyn tereńinen túsinip, ystyq yqylasyn kórsetken qazaq  halqy bizge óte jyly kórinedi. Bizdiń urpaqtarymyz qazaq topyraǵynda ósip-ónip, qazaq eli men jerine adal qyzmet etip keledi .

Sany az bolǵanymen, qarashaı-balqar jurty ulttyq bolmysyn saqtap, mádenı ortalyqtary arqyly, ózindik salt-dástúr men mádenıeti barda  ult retindegi erekshelikterin qasterleı biletin halyq. Búginde osy Assambleıa, taǵdyry toǵysqan etnostyq ult ókilderiniń aýyzbirshiligin bir shańyraq astynda uıytyp, birligin nyǵaıtý baǵytynda tolaıym tirlikter atqarýda - dedi qarashaı-balqarlar birlestiginiń basshysy Lelá Ahmadqyzy.

Jıyn sońynda Jambyl oblysy QHA ıgi is-sharalaryna aıanbaı óz úlesterin qosyp, qaıyrymdylyq tanytyp júrgen «Birlik» qarashaı-balqarlar birlestiginiń Analar keńesiniń bedeldi músheleri men shyǵarmashylyq jastaryna alǵys hattar men syılyqtar tartý etildi.