Toqaev jazýshylar forýmynda tyń usynys jasady dep habarlaıdy Qamshy.kz aqparat agenttigi sputniknews.kz saıtyna silteme jasap. 

Memleket basshysy Qasym-Jomart Toqaev Azıa qalamgerleriniń I forýmynda jazýshylardyń halyqaralyq syılyǵyn taǵaıyndaýdy usyndy.

"Azıa ádebıetiniń órisi aıtarlyqtaı keńeıip keledi. Shyǵystan shyqqan qalamgerler kúlli dúnıeni moıyndatyp otyr. Bul rette Azıa ádebıetin álemge áıgilep, dáripteı túsý forýmnyń taǵy bir mańyzdy mindeti dep sanaımyz. Shyǵys danalyǵynyń dástúr sabaqtastyǵy sizderdiń týyndylaryńyz arqyly jalǵasyn tabady dep oılaımyz", - dedi Toqaev.

Prezıdenttiń aıtýynsha, jahandaný dáýirinde Azıa syn-qaterlerge laıyqty tótep bere otyryp, ózine tán biregeı erekshelikterin saqtap keledi. Batys tehnologıasy Azıa rýhanıatymen úndesip, shyǵystyq jańǵyrý úlgisin dúnıege ákeldi.

"Biz bul úrdisti qoldap, álem halyqtarynyń yntymaq-birligin nyǵaıtýǵa úles qosýǵa tıispiz. Azıa mádenıetin odan ary damytý úshin aldymen Azıa qalamgerleriniń forýmy shyǵarmashylyq qaýymnyń dıalog alańyna aınalýy kerek. Azıany búkilálemdik rýhanı damý alańy retinde damytý aıryqsha mańyzdy. Sondyqtan ádebı jetistikterdi jańǵyrtý úshin jaǵdaı jasaý - basty mindetterdiń biri. Osy maqsatta Azıanyń ádebı syılyǵyn taǵaıyndaǵan jón. Álemdegi áıgili syılyqtar sıaqty bul marapattyń da bedelin arttyrýǵa kúsh salý kerek", - dedi Toqaev.

Budan bólek, prezıdent Azıa qalamgerleriniń ortaq elektrondy kitaphanasyn qurýdy usyndy.