Elbasy-Tuńǵysh Prezıdenttiń bastamasymen ózgeris engizilgen áleýmettik kómektiń jańa túri kóp balaly otbasylardyń tabysyn eseleýge mol múmkindik berdi. Bul oraıda jambyldyqtar ataýly áleýmettik kómektiń sharapatyn aıqyn sezinýde. Jambyldyq kóp balaly analarǵa ataýly áleýmettik kómek taǵaıyndaýǵa 21,5 mıllıarda teńge qarastyrylǵan, dep jazady Qamshy.kz aqparat agenttigi. 

Aǵymdaǵy jyldyń 9 aıynda áleýmettik kómek 35,5 myń otbasyna taǵaıyndaldy. Sáıkesinshe 179,5 myń jambyldyq jańa formattaǵy áleýmettik kómekti kádesine jaratty. Elbasy bastamasy eldegi kedeıshigi shegi 50 paıyzdan 70 paıyzǵa deıin kóterilýi ataýly áleýmettik kómektiń ortasha mólsherin 2,5 esege ósirýge jol ashty. Máselen Jambyl oblysynda 2019 jyldyń 1 toqsanynda ataýly áleýmettik kómektiń ortasha mólsheri 5246 teńge bolsa, qazan aıynda bul kórsetkish 12935 teńgege deıin ósti.

–Aǵymdaǵy jyly búdjetten oblystaǵy ataýly áleýmettik kómekti alýshylarǵa tıisti tólem jasaýǵa 21 mıllıard 600 mıllıon teńge qarastyryldy. Jyl basynan bergi 9 aı ishindegi bul somanyń 67 paıyzy nemese 14 mıllıard 500 mıllıon teńgesi maqsatty ıgerildi. Jambyldyqtarǵa ataýly áleýmettik kómek taǵaıyndaýǵa bólingen qarjynyń 20 mıllıard teńgesi respýblıkalyq búdjetten bólinse qalǵan 1 mıllıard 600 mıllıon teńge jergilikti búdjetten qarastyrylǵan.

Negizinen ataýly áleýmettik kómek taǵaıyndalǵan 17 myń otbasy kóp balaly januıaǵa jatady. Olarǵa shamamen 8 mıllıard 400 mıllıon teńge kóleminde ataýly áleýmettik kómek tólendi. Jaqynda ǵana Eńbek jáne halyqtyq áleýmettik qorǵaý mınıstrligi barsha kóp balaly analarǵa otbasylyq ortasha tabysty esepke almastan jańa ataýly áleýmettik kómek taǵaıyndaýdyń tıimti tetikterin usyndy. Úkimet otyrysynda qaralǵan bul joba boıynsha keler jyldan bastap barlyq kóp balaly analarǵa bala sanyna qaraı aı saıyn 42500 teńgeden 73 375 teńgege deıin tólem alady. Bastysy kómektiń bul túrin alýshylardyń otbasynda 4 jáne odan da kóp kámelet jasyna tolmaǵan nemese arnaýly orta, joǵary oqý oryndarynda bilim alyp jatqan jasy 23-ke tolmaǵan balalary bolýy kerek,–deıdi oblys ákimdiginiń jumyspen qamtýdy úılestirý jáne áleýmettik baǵdarlamalar basqarmasynyń basshysy Tımýrjan Nurymbetov.