Jambyl oblysyndaǵy áleýmettik nysandar jylytý maýsymyna saqadaı saı. Sondaı-aq qysqy maýsymǵa jylýmen qamtý júıeleriniń 99,6 paıyzy, kóp qabatty úılerdiń 99,1 paıyzy daıyn, dep jazady Qamshy.kz aqparat agenttigi. 

Oblys ákimdigi energetıka jáne turǵyn-úı komýnaldyq sharýashylyq basqarmasy basshysynyń orynbasary Qudaıbergen Qorǵanbaev óńirdegi jylýmen qamtýshy kásiporyndar osynaý jaýapty kezeńde jambyldyqtarǵa esh aqaýsyz qyzmet kórsetýge ázir ekendigin aıtady.

–Búginde oblys aýmaǵyndaǵy jylý berý jumystary 437 avtonomdyq qazandyqtar arqyly júrgiziledi. Olar arqyly 786 bilim berý, 390 densaýlyq saqtaý, 494 mádenıet nysanyna jylý beriledi. Atalmysh nysandar jylytý maýsymy bastalǵan sátten óz qyzmetine kirisedi. Sonymen birge óńirdegi 1593 turǵyn úıdiń 1579-indegi qysqy daıyndyq tıisti talaptyń údesinen shyǵady. Qalǵan turǵyn úılerdiń jylytý maýsymyna daıyndyǵy jylý berilgenge deıin qaıta qalpyna keltiriletin bolady,– dedi Qudaıbergen Nurserikuly.

Basqarma basshysy orynbasarynyń málimdeýinshe óńirde jylytý maýsymyna qajetti qatty otyn qory da jetkilikti kórinedi. Bul oraıda búdjettik mekemeler men birge turǵyndardyń kómirge degen suranysyn óteýde basty nazarǵa alynǵan.

–Jylytý maýsymynda búdjettik mekemeler tutynatyn 66,4 myń tonna kómir tolyqtaı túsirilip, tıisti oryndaryna jetkizildi. Al óńir turǵyndarynyń kómirge suranys kólemi 254,6 myń tonna bolsa ázirge oblys aýmaǵyna onyń 58 paıyzy ǵana jetkizildi. Jetkizilgen kómirdi jylytý maýsymynda qatty otynǵa táýeldi tutynýshylarǵa jetkizýmen 30 jekemenshik kompanıa men jeke kásipker aınalysýda. Qazirgi naryqta kómirdiń 1 tonnasy 11-14 myń teńge aralyǵynda saýdalynyp jatyr, –deıdi basqarma basshysy.

Óńirdegi jylytý maýsymyna daıyndyq jaıynda sóz etkende mono jáne shaǵyn qalalardaǵy ahýaldy aınalyp ótýge bolmas. Sáıkesinshe 2019-2020 jylytý maýsymynda oblys aýmaǵyndaǵy mono, shaǵyn qalalardy jylýmen qamtıtyn ortalyq qazandyqtardy otynmen qamtamasyz etý úshin 1,1 mıllıard teńge qajet etiledi. Búgingi tańda bul qarjynyń 50 paıyzy bólinip, maqsatty ıgerilýde.

Jalpy oblys ortalyǵynda jylytý maýsymyn qazan aıynyń 15-juldyzynan bastap josparlanyp otyr. Taraz qalasynda bıyl da birqatar kóshelerdegi negizgi jylý qubyrlary aýystyryldy. Óz kezeginde bul jumystar jylytý maýsymyn sapaly ári esh aqaýsyz ótkizý maqsatynda jasalyp otyr.