Sóz ónerin kıe tutqan qalam ıelerine qaı qoǵamda ómir súrmesin aınalasyna sergek qaraýmen qatar, ómir qubylystarynsezimtaldyqpen sýretteý tán. Ótken dáýirdiń tynysyn, náýbet jyldardyń sherli shejiresin, ózi ómir súrip jatqan qoǵamnyń san qatparly qıametin qapysyz ańǵaryp, júıeli jazyp júrgen qalamgerlerdiń qatarynda Smaǵul Elýbaıdy, onyń qalamynan týǵan «Ańshy bala», «Jaryq dúnıe», «Aq boz úı», «Minájat», «Qıamet - qaıym ǵasyry» t.b. shyǵarmalaryn ataýǵa bolady.

Ál-Farabı atyndaǵy Qazaq ulttyq ýnıversıtetiniń fılologıa, ádebıettaný jáne álem tilderi fakúltetinde qalamgermen ótken kezdesý kópshiliktiń kóńilinen shyqty deýge tolyq negiz bar. Kezdesýdi ashyp, júrgizip otyrǵan profesor Qanıpash Mádibaıdyń, jazýshy-ǵalym Asylan Jaqsylyqtyń qalamgerdiń shyǵarmashylyǵy, dáýir únin sıpattaýdaǵy ózine tán qoltańbasy, fılosofıalyq tereńdikke negizdelgen qalamgerlik qarym-qabileti jaıly baıypty oı-tolǵamdary, S. Elýbaıdyń qoǵamnyń kókeıtesti máselelerin dóp basyp, tereńinen qozǵaǵan salıqaly áńgimeleri, qoıylǵan mazmundy suraqqa tolymdy jaýap estigen stýdentterdiń kóńil aýany sózimizge dálel.

Keshti uıymdastyrýǵa uıytqy bolǵan kýrator-edvaızer Altynaı Júsipovanyń kýratorlyq toby daıyndaǵan jazýshynyń shyǵarmashylyq áleminen, qalamgerlik qabiletinen, azamattyq dúnıetanymynan syr ańǵartatyn slaıdtar, beınerolıkter, kitap kórmesi jıynnyń mazmunyn baıyta túskeni anyq.

«Rýhanı damýda negizgi rólge árqashan ıntellıgensıa ıe. 2050 jylǵy Qazaqstan progresıvti ıdealdar qoǵamy bolýǵa tıis. Bizdiń qoǵamymyzdyń qazirgi kózqarastarynyń negizin dál osy ıntellıgensıa berýi kerek. Intellıgensıa qalyptasqan memleket kezeńinde jańa jalpyulttyq qundylyqtar jasaýda aldyńǵy qatarly kúsh bolýy kerek. Olar zamanǵa saı jáne bolashaqqa qulshynysty bolýǵa tıis. Biz jastarymyz baǵyt alyp, boı túzeýge tıis óz zamanymyzdyń jańa qaharmandaryn kórsetý jáne jasaýymyz kerek», - dep Qazaqstan Respýblıkasynyń Prezıdenti N.Á.Nazarbaevtyń «Qazaqstan – 2050» Strategıasy: Qalyptasqan memlekettiń jańa saıası baǵyty» atty Qazaqstan halqyna  Joldaýynda atap kórsetkendeı, qalamgerler qaýymyna mindetteler júk, artylar senim az bolmaq emes.

Smaǵul myrzanyń  mazmundy áńgimesinen soń kezek aýdıtorıany qamtydy. Jıyn áńgime-suhbatqa qurylyp, jazýshyǵa suraqtar qoıyldy. Bolashaq til-ádebıet mamandaryn mazalaǵan suraqtar jazýshynyń kınodramatýrgıadaǵy, qazirgi shyǵarmashylyǵyndaǵy izdenisterge jáne búgingi ádebı syn tóńiregine, qoǵamnyń dilgir máselelerine baılanysty órbidi. Qalamgermen  suhbat júrgizý barysynda jas býyn ókilderi ózderiniń bilim deńgeıleriniń  jan-jaqty, ári tereń ekendigimen súısintti. Rýhanıattyń kókeıtesti máseleleri aıasynda ótkizilgen júzdesýdiń  jastarǵa bereri mol, taǵylymy zor boldy.

Kezdesý sońynda stýdentter men ustazdarǵa S.Elýbaı qoltańba berip, estelik sýretke tústi.

Shoqan SHORTANBAEV,

Ál-Farabı atyndaǵy QazUÝ-diń aǵa oqytýshysy