Órt – tilsiz jaý. Tosynnan týyndaıtyn tótenshe jaǵdaıda adam men mal-múlik shyǵynyn boldyrmas úshin jedel qyzmettiń jýyq arada ornalasýy asa mańyzdy. Osyǵan oraı, Jambyl oblysynyń shalǵaı jatqan eldi mekenderinde órt sóndirý beketteri qurylýda. Sonyń biri jýyrda Merki aýdanynyń Andas batyr aýylynda ashyldy.

Aýdan búdjetiniń shaǵyndyǵyn eskere otyryp, Merki aýdany ákiminiń kelisimimen 2019 jyly Andas Batyr aýylynda órt sóndirý beketin kezeń-kezeńmen qurý jospary jasalyp, oblys ákiminiń birinshi orynbasary bekitildi. Aýdandyq búdjetten beketti ustaý úshin 5 mln. 244 myń teńge bólindi. Atalǵan beket alty shtattyq qyzmetkerlermen jasaqtalǵan.

Resimdeý jáne materıaldyq-tehnıkalyq bazany qurý jumystary tolyq aıaqtalǵan soń Andas batyr aýylynda órt sóndirý beketiniń ashylý saltanaty ótti.

Jańa órt sóndirý beketiniń ashylý is-sharalaryna Merki aýdany ákiminiń orynbasary Meıirjan Súleımenov, Andas batyr aýyldyq okrýgi ákimi Beıbit Mazıev, Jambyl oblysy Tótenshe jaǵdaılar departamentiniń Merki aýdany Tótenshe jaǵdaılar bólimi men órt sóndirý bóliminiń qyzmetkerleri, sondaı-aq Andas Batyr aýylynyń turǵyndary qatysty.

Órt sóndirý beketi Andas batyr aýyldyq okrýgi ákimdigi apparatynyń ǵımaratynda ornalasqan. Onda demalý bólmesi, telefon baılanysymen qamtamasyz etilgen dıspecherlik bólme jáne órt sóndirý avtomobıline arnalǵan jyly boks bar.

Jańadan qurylǵan órt sóndirý beketiniń komandasy janýǵa shyǵyp qana qoımaı, olardyń jaýapkershilik aımaǵynda bolyp jatqan basqa da tótenshe jaǵdaılardy joıýǵa qatysady, qıyn jaǵdaıǵa tap bolǵan adamdarǵa kómek kórsetedi, halyqqa kómek kórsetedi, sondaı-aq aldyn alý jumystarymen aınalysady.

Órt sóndirý beketiniń jaýapkershilik aımaǵynda 20 shaqyrym radıýsta 8 myńnan astam turǵyny bar 7 eldi meken ornalasqan.

Oblystyq TJD Merki aýdany tótenshe jaǵdaılar bólimi men órt sóndirý bólimi qyzmetkerleri beketiniń ashylý saltanaty aıaqtalǵannan keıin órt sóndirý beketiniń jeke quramymen shartty órtti sóndirý boıynsha teorıalyq jáne praktıkalyq sabaqtar ótkizdi, jattyǵýlar barysynda olardyń órt kezindegi is-áreketteri, órt kezinde órt avtokóliginen sý berý jáne sý kózderinen sý alý amaldary pysyqtaldy.

«Órt sóndirý beketterin qurý jumystary turaqty baqylaýda jáne odan ári jalǵasatyn bolady» – deıdi oblystyq Tótenshe jaǵdaılar departamentiniń mamandary.