Jambyl oblysy ákimdiginiń mádenıet, arhıvter jáne qujattama basqarmasy Oblystyq halyq shyǵarmashylyǵy ortalyǵynyń uıymdastyrýymen Oblystyq «Taraz sımfonıasy» óner festıvaliniń Gala konserti ótti. K.Ázirbaev atyndaǵy «Balasaǵun» ortalyq konsert zalynda ótken sharany shahar turǵyndary ystyq yqlaspen qabyl aldy.

«Rýhanı jańǵyrý» baǵdarlamasy aıasynda uıymdastyrylǵan osynaý aıtýly is-sharany ótkizýdegi basty maqsat – oblys aýmaǵynda klasıka, jaz, romans janrlaryn damytý, shyǵarmashylyq deńgeıin kóterý jáne ónerli, daryndy oryndaýshylardyń shyǵarmashylyq turǵyda jetilýine jaǵdaı jasaý bolatyn.

Sharany Jambyl oblysy ákiminiń orynbasary Sulýshash Qurmanbekova ashyp berdi. Baıqaýǵa qatysýshylarǵa sáttilik tilegen aımaq basshysynyń orynbasary óz sózinde óńirden shyqqan jas talanttardyń kópetep tanylýyna jaǵdaı jasaı otyryp, mádenıetimizdiń, ulttyq ónermizdiń órkendeýine yqpal etýimiz kerektigin tilge tıek etti.

Eń birinshi Muqaǵalı Maqataevtyń sózine jazylǵan Nurlan Baıkózovtyń áni «Adasqan shaǵala» ánin Qordaı aýdanynyń ónerpazy Aıdaı Janaı shyrqady. Barlyq ánderdi Ońtústik sırk ujymynyń «H-Band» estradalyq-djaz orkestri súıemeldedi. Gala-konsertte qatysýshylardyń árqaısysyn mádenıet salasynda eleýli eńbek etip júrgen birqatar tulǵalar marapattady. Atap aıtqanda, Qazaqstan Respýblıkasynyń mádenıet salasynyń úzdigi Aýesqan Salabekov, Qazaqstan Respýblıkasy Mádenıet salasynyń úzdigi, aqyn Úmit Bıtenova, Qazaqstan Respýblıkasynyń eńbek sińirgen qaıratkeri Muhtar Rahmanqulov, Qazaqstan Respýblıkasynyń Mádenıet salasynyń úzdigi, ánshi-kompozıtor Jandos Omarov, akter, kompozıtor Málik Aqúrpekov t.b bar.

Konsertte «Úsh baqytym», «Tarantella», «Ajarlym», «SWAY», «Ot vsego serdsa», «Zazdravnaıa romans», «Mariage d amour», «Tokkata», «I snova Karnaval», «Balalyq shaqpen qoshtasý», «Erketaıym», «El, Jer - Ana», «Óz elim» ánderi men N.Baıkózovtiń «Sholpan ataǵa hat», Halyq áni «Qyzdar-aı», «Ballada o lúbvı», «Almatym», «Ǵashyqtar muńy», «Kerbezim», «Saǵynysh tamshysy», «Shattanaıyq» sekildi birqatar kompozıtorlyq shyǵarmalary oryndaldy.

Gala-konsert sońynda qazaq estradasynyń juldyzy Jubanysh Jeksenuly «Óz elim» Moıynqum aýdanynyń ónerpazy Baǵlan Shýbaevpen birge oryndady. Shara sońynda Jambyl oblysy ákiminiń yqylas gúli tabys etildi.