Aqordanyń aldyna bılikten járdem surap barǵan astanalyq turǵyn Jeńisgúl Ermuhamettiń otbasyna ýaqytsha panalaıtyn eki bólmeli páter beriletin boldy. Bul týraly «Qamshy» portaly «Azattyqqa» silteme jasaı otyryp habarlaıdy. Astana qalasy jumyspen qamtý jáne áleýmettik baǵdarlamalar basqarmasynyń bastyǵy Lázzat Abýeva Jeńisgúl Ermuhametti qabyldap, oǵan eki bólmeli ýaqytsha páter beretinin aıtqan.
Úshinshi toptaǵy múgedek Jeńisgúl Ermuhamet otbasynda segiz bala baryn, kúıeýiniń ekinshi toptaǵy múgedek ekenin, 2004 jyly Qytaıdan Shyǵys Qazaqstan oblysy Ulan aýdanyna qonys aýdarǵan otbasy byltyr Astanaǵa kóship kelgenin aıtady. Sózine qaraǵanda, osy kezge deıin 35 myń teńgege baspana jaldap turyp kelgen.
Segiz balasymen birge Aqordanyń aldyna kelgen Jeńisgúlge qalalyq prokýratýra men qala ákimdiginen kelgen ókilder «ákimdikke baryp sóılesýdi" usynǵan. Biraq ózin prezıdent Nazarbaevqa jolyqtyrýdy talap etken áıel ákimdikke barýdan bas tartqan. Budan soń polıseıler áıeldi balalarymen birge kólikke kúshtep otyrǵyzyp, Aqordanyń aldynan alyp ketken. Jeńisgúl osylaısha prezıdentpen jolyǵa almady. Biraq ýaqytsha bolsa da baspana máselesin sheshe aldy.
